Ushtria kineze tani e tutje do kryejë stërvitje ‘të rregullta’ në anën lindore të ngushticës së Tajvanit, njoftoi të dielën TV shtetëror kinez, sipas Reuters.
Linja mesatare është një linjë jozyrtare e kontrollit që ndan Kinën dhe Tajvanin, të cilën anijet luftarake dhe avionët ushtarakë nga të dy palët zakonisht nuk e kalojnë.
Pekini nisi stërvitjet ushtarake me zjarr të drejtpërdrejtë në shkallë të gjerë rreth Tajvanit këtë javë në përgjigje të vizitës së Kryetares së Dhomës së Përfaqësuesve të SHBA Nancy Pelosi në ishull.
Kina e konsideron ishullin vetëqeverisës territorin e saj dhe kundërshton kontaktet midis zyrtarëve të huaj dhe qeverisë së Taipeit.
Anijet luftarake dhe avionët kinezë vazhduan të stërviten për sulme dhe ulje amfibe në brigjet e Tajvanit të shtunën.
Media shtetërore kineze i përshkruan në mënyrë të përsëritur stërvitjet si një provë për ‘një operacion ribashkimi me forcë’, ndërsa Taipei argumentoi se manovrat janë të barabarta me një bllokadë të ishullit. Ministria e Mbrojtjes e Tajvanit tha se marina e saj po gjurmonte lëvizjen e anijeve kineze.
“Masat tona janë të vendosura, të forta dhe proporcionale.” – u tha gazetarëve të shtunën ministri i Jashtëm kinez Wang Yi, duke shtuar se stërvitjet po kryheshin në përputhje me ligjin ndërkombëtar. Ai tha se stërvitjet kanë për qëllim ‘disiplinimin e forcave të pavarësisë së Tajvanit’.
Një zëdhënës i Shtëpisë së Bardhë, ndërkohë, i përshkroi stërvitjet rreth Tajvanit si ‘një përshkallëzim të rëndësishëm në përpjekjet e Kinës për të ndryshuar status quo-në’.
