Lufthansa, kompania kryesore ajrore gjermane, po anulon rreth 1000 fluturime gjatë verës, sepse nuk mund të gjejë staf të mjaftueshëm.
Linja ajrore ka anuluar rreth 900 fluturime evropiane të brendshme dhe të shkurtra, të planifikuara fillimisht të niseshin nga qendrat e saj në Frankfurt dhe Mynih në korrik, tha një zëdhënës për Insider.
Fluturimet e anuluara do të niseshin të premteve, të shtunave dhe të dielave, dhe zëdhënësi tha se ato përbëjnë rreth 5% të orarit mesatar të fundjavës.
Euroëings, marka e linjave ajrore me kosto të ulët e Lufthansa Group, gjithashtu ‘u detyrua të hiqte disa qindra fluturime nga sistemi për të stabilizuar shërbimin e tij për korrikun’, tha zëdhënësi.
Megjithëse pasagjerët po kthehen të fluturojnë pasi kërkesa për udhëtime të lira dhe biznesi po rritet, ‘infrastruktura ende nuk është riparuar plotësisht’, tha zëdhënësi.
“E gjithë industria e aviacionit, veçanërisht në Evropë, aktualisht po vuan nga pengesat dhe mungesat e stafit.” – vazhdoi zëdhënësi.
“Kjo vlen për aeroportet, shërbimet tokësore, kontrollin e trafikut ajror dhe gjithashtu linjat ajrore.”
Linjat ajrore kanë luftuar për të ekuilibruar nivelet e tyre të personelit me ndryshimin e numrit të njerëzve që duan të fluturojnë, duke alternuar mes pushimeve, largimeve nga puna dhe punësimeve. Linjat ajrore përfshirë Delta, JetBlue, Alaska dhe British Airways kanë shkurtuar oraret e tyre verore për shkak të rritjes së kërkesës dhe sfidave të personelit.
Grupi Lufthansa tha në një prezantim që shoqëronte raportin e tij vjetor të vitit 2021 se kishte përfunduar ‘reduktimin e paprecedentë të fuqisë punëtore’ në Gjermani për t’iu përshtatur ‘ndryshimeve strukturore të tregut’ si pjesë e një plani për të pakësuar shpenzimet e personelit deri në 20% krahasuar me vitin 2019.
Ai tha se gjatë 2020 dhe 2021 numri i përgjithshëm i punonjësve të tij kishte rënë me gati një të katërtën në 105,000, duke përfshirë një pakësim prej 31% në mesin e stafit tokësor.
Në vitin 2021, rreth 4,500 staf ranë dakord të largoheshin nga kompania përmes programeve të largimit vullnetar. Grupi Lufthansa tha se kjo ‘ndihmoi për të pakësuar fuqinë punëtore në një mënyrë të përgjegjshme shoqërore dhe për të shmangur pushimet e detyrueshme nga puna’.
