Deputeti gjerman i krahut të majtë, Klaus Ernst, argumentoi se garancitë për mosbashkimin e Ukrainës me bllokun ushtarak të udhëhequr nga SHBA do të ndihmonin në zgjidhjen e tensioneve aktuale midis Perëndimit dhe Rusisë.
“Për të zbutur situatën në afat të shkurtër, Perëndimi duhet të sigurojë Rusinë se Ukraina nuk do të pranohet në NATO”, tha Ernst, një ligjvënës veteran dhe ish-lider i partisë së Majtë, për RND të premten. “Do të ishte më mirë nëse Ukrainës do t’i jepej një status si Finlanda, një status neutraliteti.”
Klaus po i referohej traditës së gjatë të Finlandës për të mos u lidhur zyrtarisht me blloqet ushtarake. Vendi nordik nuk është anëtar i NATO-s dhe ka ruajtur neutralitetin gjatë Luftës së Ftohtë.
“Rusia dëshiron të sigurojë kufijtë e saj dhe të mos ketë trupa të NATO-s në pragun e saj”, tha Ernst, duke shtuar se Perëndimi duhet të kuptojë pozicionin e Moskës në ngecjen e tanishme në lidhje me Ukrainën dhe sigurinë më të gjerë në Evropë.
Komentet e Ernst erdhën pasi ministrja e Jashtme gjermane Annalena Baerbock paralajmëroi Moskën për ‘pasoja të rënda’, duke përfshirë potencialisht sanksione ndaj gazsjellësit rus Nord Stream 2, nëse trupat ruse sulmojnë Ukrainën.
