Federatës Shqiptare të Futbollit i është sulmuar uebi zyrtar në internet.
Në një deklaratë publike FSHF-ja thotë se uebi u sulmua pasi u publikuan fakte tronditëse për ndërhyrjen flagrante të kryetarit të Bashkisë në zgjedhjet e Shoqatës Rajonale të Futbollit të Tiranës.
FSHF-ja thotë më tej se ky sulm ka prapavijë politike dhe do marrë përgjigjen që meriton.
“Në një ngjarje të paprecedentë uebi i qeverisë së futbollit është sulmuar në mënyrë agresive nga hakerat dhe mbyllur sot pas publikimit të fakteve tronditëse për ndërhyrjen flagrante të kryetarit të Bashkisë së Tiranës, Erion Veliaj në zgjedhjet e Shoqatës Rajonale të Futbollit Tiranë.
Në çastet që po flasim faqja vazhdon të jetë e mbyllur për shkak të këtij sulmi të qartë me prapavijë politike.
FSHF dënon këtë sulm skandaloz të politikës dhe i bën thirrje që të tërhiqen sa më parë pasi kjo taktikë mund të ketë pasoja të rënda për cilindo të përfshirë në këtë akt të turpshëm. Pavarësisht këtij sulmi, komuniteti i futbollit shqiptar do të vazhdojë të denoncojë të gjitha ndërhyrjet, sulmet dhe presionet e politikës dhe nuk do të tërhiqet përballë shantazheve dhe kërcënimeve të pushtetit.
Ky akt i turpshëm do marrë përgjigjen që meriton”-deklaron FSHF-ja.
