Presidenti Joe Biden është “në gjendje shpirtërore të mirë” dhe rifilloi detyrat e tij të premten pasi i transferoi përkohësisht pushtetin zëvendëspresidentes Kamala Harris, ndërsa i nënshtrohej një kolonoskopie rutinë.
Biden iu nënshtrua procedurës gjatë një kontrolli rutinë në Qendrën Mjekësore Walter Reed.
Mjeku i Bidenit, Dr. Kevin O’Connor tha se gjatë kolonoskopisë, një polip i vetëm 3 mm me pamje beninje u identifikua dhe “u hoq pa vështirësi”.
Në një përmbledhje të ekzaminimit mjekësor të presidentit të publikuar nga Shtëpia e Bardhë, mjeku shton gjithashtu se një vlerësim i polipit pritet të bëhet përsëri në fillim të javës së ardhshme.
Për ata që janë të paqartë, një polipi është një ind shtesë që rritet brenda trupit. Polipet e zorrës rriten në zorrën e trashë e cila është pjesa e fundit e traktit tretës. Një pjesë e madhe e polipeve nuk janë të rrezikshëm. Shumica e tyre janë beninj, që do të thotë jo kancerozë, por me kalimin e kohës disa lloje polipesh mund të kthehen në kancer.
Për të qenë i sigurt, doktori i heq dhe vlerëson natyrën e tyre dhe në rastin e Bidenit kjo ka ndodhur.
Sipas përmbledhjes, ekzaminimi fizik i kryer një ditë përpara ditëlindjes së 79-të të presidentit zbuloi se Biden ishte në gjendje të mirë shëndetësore, shkruan USA Today.
Mjeku O’Connor pranoi se Biden kishte një kollitje të vazhdueshme, gjë që ka qenë e dukshme gjatë disa prej fjalimeve të tij. O’Connor tha se kolla ka të ngjarë të jetë një simptomë e refluksit gastroezofageal, i cili gjithashtu mund të kontribuojë në bllokimin e rastit të sinuseve.
O’Connor tregoi gjithashtu se Biden ka shfaqur simptoma të tilla “për aq kohë sa e ka njohur”. Ekzaminimi otolaringologjik nuk gjeti polipe ose tumore, si dhe ekzaminimi gastroenterologjik nuk gjeti shenja të ulçerës, kancerit ose kushteve të tjera serioze. Ekzaminim i mushkërive gjithashtu u kthye normal.