Disa shtete thonë se ekziston një kërcënim i lartë për një sulm terrorist në aeroportin e Kabulit dhe kanë paralajmëruar qytetarët e tyre që të mos udhëtojnë për atje. Australia, SHBA-të dhe Britania e Madhe kanë dhënë paralajmërime për qytetarët e tyre, duke i këshilluar të largohen menjëherë nga zona, raporton “BBC”.
Më shumë se 82,000 njerëz janë larguar me avionë nga Kabuli, i cili ra në duart e talebanëve 10 ditë më parë. Shtetet po nxitojnë për të evakuuar njerëzit deri në 31 gusht. Mijëra njerëz janë ende duke pritur brenda dhe jashtë aeroportit, duke shpresuar të fluturojnë jashtë vendit.
Talebanët kanë kundërshtuar zgjatjen e afatit të evakuuimit, por gjithashtu kanë premtuar se do të lejojnë të huajt dhe afganët të largohen nga vendi përtej 31 gushtit, sipas sekretarit Amerikan të Shtetit Antony Blinken.
Të enjten, ministrja Australiane për Punët e Jashtme, Marise Payne, tha: “Ekziston një kërcënim i vazhdueshëm dhe shumë i lartë i një sulmi terrorist”. Mbretëria e Bashkuar dha këshilla të ngjashme duke u kërkuar njerëzve atje “të largohen në një vend të sigurt dhe të presin këshilla të mëtejshme”. Zyra e Jashtme tha se situata e sigurisë në Afganistan “mbetet e paqëndrueshme” duke shtuar se kishte “një kërcënim të vazhdueshëm dhe të lartë të një sulmi terrorist”.
Asnjë nga vendet nuk dha informacion shtesë mbi kërcënimin konkret të sigurisë.
Në një fjalim të martën, presidenti amerikan Joe Biden tha se transporti ajror i kontrolluar nga SHBA-të do të duhej të përfundonte së shpejti për shkak të një kërcënimi në rritje nga grupi i Shtetit Islamik në Afganistan.
Rreth 19,000 njerëz janë evakuuar në fluturimet e organizuara nga SHBA-të në 24 orët e fundit, tha Blinken të mërkurën, me transportin ajror të shtuar ditët e fundit. Ai tha se SHBA-të ishin ende në rrugën e duhur për të përfunduar operacionet në aeroportin e Kabulit deri në fund të muajit.”Vetëm Shtetet e Bashkuara mund të organizojnë dhe ekzekutojnë një mision të kësaj shkalle dhe të këtij kompleksiteti,” u tha ai gazetarëve në Uashington. “Talebanët kanë marrë angazhime publike dhe private për të siguruar dhe lejuar kalimin e sigurt për amerikanët, për shtetasit e vendeve të treta dhe afganët në rrezik që do kalojnë deri më 31 gusht,” tha ai. Ai shtoi se SHBA-të do të ndihmonin ata që donin të largoheshin nga Afganistani “jo vetëm gjatë kohëzgjatjes së misionit tonë të evakuimit dhe zhvendosjes, por çdo ditë më pas”.
Deri në 1.500 shtetas amerikanë mund të kenë mbetur ende në Afganistan dhe administrata amerikane po bën përpjekje për t’i gjetur ata, tha sekretari i shtetit.
CIA dhe ushtria amerikane po kryejnë operacione klandestine për të nxjerrë amerikanët duke përdorur helikopterë dhe trupa tokësore, thanë zyrtarët amerikanë për “Wall Street Journal”. Operacionet e rrezikshme kanë qenë brenda dhe jashtë Kabulit, thotë gazeta.
Pentagoni ka thënë se 10.000 njerëz janë ende duke pritur të evakuohen nga aeroporti i Kabulit me avionë amerikanë. Ekziston frika për mijëra afganë të tjerë, të cilët janë të dëshpëruar të largohen, por nuk mund të arrijnë në aeroport. Korrespondentët e BBC-së thonë se shumë nga ata që u kthyen mbrapsht nga talebanët në aeroport duket se kanë letra udhëtimi.
Presidenti Joe Biden shkroi në “Twitter” se SHBA-të “do të bëjnë gjithçka” për të “siguruar evakuim të sigurt”. Mbretëria e Bashkuar tha se operacioni i saj i evakuimit po lëvizte me “ritëm të konsiderueshëm”, me rreth 1,200 njerëz. Sekretari i Jashtëm Dominic Raab tha se qeveria e tij do të përdorte “çdo orë dhe ditë që na ka mbetur” për të larguar shtetasit britanikë dhe afganët e kualifikuar.
Aeroporti i Kabulit aktualisht mbrohet nga 5.800 trupa amerikane dhe 1.000 trupa britanike.
