Vendosni fjalën kyçe....

Ai do t’u rrisë taksat, por më të pasurit e Amerikës fituan më shumë në 100 ditët e para të Presidencës së Joe Bidenit


Presidenti i SHBA-ve Joe Biden vazhdimisht ka deklaruar që kërkon që më të pasurit të paguajnë pjesën e tyre të taksave dhe ka paralajmëruar një rritje të tyre, mirëpo rezulton se ata janë bërë një nga përfituesit kryesorë të presidencës së tij.

Kjo sepse sipas llogaritjeve të Bloomberg, vlera e kombinuar neto e 100 personave më të pasur në SHBA është rritur me 195 miliardë dollarë që kur Biden mori detyrën. Nga zgjedhja e tij deri në inaugurimin e tij, ata shtuan 267 miliardë dollarë në pasuritë e tyre, duke e çuar fitimin e tyre të përgjithshëm në 461 miliardë dollarë që nga 4 nëntori.

Rritja e pasurisë së miliarderëve në 100 ditët e para të presidencës së Biden është rreth 20% e rezervave të parave që ata miliarderë grumbulluan midis inaugurimit të Trumpit dhe zgjedhjeve të vitit 2020. Sipas të dhënave të Bloomberg, ata u bënë më të pasur me 860 miliardë dollarë gjatë asaj periudhe.

Fitimet bazohen kryesisht në masat stimuluese për të ndihmuar ekonominë të zbusë krizën e koronavirusit, e cila rezultoi në një përmirësim të tregut të aksioneve. Biden miratoi një paketë tjetër stimuluese prej 1.9 trilionë dollarësh. Kjo i dha një tjetër shtysë aksioneve, me indekset e “S&P 500” dhe “Dow Jones” që u rritën në rreth 10% që nga inaugurimi i Biden.

Shefat e gjigantëve të teknologjisë dhe tregtisë elektronike si Amazon dhe Facebook ishin fituesit më të mëdhenj, si në kulmin e pandemisë ashtu edhe gjatë përmirësimit të fundit në tregun e aksioneve. Pasuria kolektive e miliarderëve amerikanë është rritur me 55% gjatë 13 muajve të fundit, duke arritur në 4.56 trilionë dollarë, sipas një raporti nga Instituti për Studime të Politikave dhe Amerikanët për Drejtësinë e Taksave. Sidoqoftë, Biden tani dëshiron që 1% e më të pasurve amerikanë “të paguajnë pjesën e tyre të drejtë”. Ai dëshiron të sjellë “miliarda dollarë” në ekonomi dhe propozon rritjen e grupit më të lartë të taksave për ata që bëjnë 400 mijë dollarë ose më shumë në 39,6% si dhe rritjen e taksave të fitimeve kapitale për ata që bëjnë më shumë se 1 milionë dollarë në vit.