Vendosni fjalën kyçe....

Furnizonte me heroinë disa zona të Tiranës, arrestohet 32-vjeçari i dyshuar


Policia e Tiranës ka vënë në pranga një 32-vjeçar, i cili dyshohet se shpërndante drogëra të forta në doza të vogla.

I riu me inicialet A.R, u kap në kuadër të operacioni policor të koduar “Devijimi”, i zhvilluar nga Seksioni për Hetimin e Narkotikëve.

Gjatë këtij operacioni, u sekuestruan 185 doza me lëndë narkotike heroinë, një sasi lëndë narkotike metadon, dy aparate celular dhe një peshore elektronike.

32-vjeçari që posedonte lëndën narkotike, dyshohet se e shpërndante atë në doza, në zonën e Selitës, Tiranës së Re dhe në disa zona të tjera të Tiranës.

NJOFTIMI I POLICISË

Në vijim të punës për goditjen e veprimtarisë kriminale të shpërndarjes së drogave të forta në doza të vogla, në bazë të informacioneve të marra në rrugë operative për një shtetas që merrej me shpërndarjen e lëndëve narkotike në zona të ndryshme në qytetin e Tiranës, është organizuar puna për goditjen dhe dokumentimin ligjor të kësaj veprimtarisë kriminale.

Gjatë operacionit policor të koduar “Devijimi”, specialistët për Hetimin e Narkotikëve, në rrugën “Sulejman Delvina“, kapën dhe arrestuan në flagrancë shtetasin A. R., 32 vjeç, banues në Tiranë.

Gjatë kontrollit fizik dhe të banesës së këtij shtetasi, sherbimet e Policisë gjetën dhe sekuestruan 185 doza me lëndë narkotike heroinë, një sasi me lëndë narkotike metadon, 2 aparate celular dhe 1 peshore elektronike.

Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprën penale “Prodhimi dhe shitja e narkotikëve”.