Rusia ka dëbuar një diplomate shqiptare të ambasadës shqiptare në Moskë. Sipas Ministrisë së Jashtme të Rusisë, masa është përgjigje ndaj Shqipërisë, pas dëbimit të një diplomati të ambasadës ruse në Tiranë.
Sekretarja e Parë e ambasadës shqiptare në Moskë, Jonida Drogu, ka 72 orë kohë që të largohet nga Rusia, thuhet në njoftimin e Ministrisë së Jashtme të vendit, shkruan Sputnik.
Vendimi i është komunikuar ambasadorit shqiptar në Moskë, Arben Gazioni, gjatë një takimi në Ministrinë e Jashtme të Rusisë.
Masa vjen pak kohë pas dëbimit të Sekretarit të dytë të ambasadës ruse në Tiranë, Alexey Krivosheev, pasi ky i fundit sipas palës shqiptare kishte shkelur në mënyrë të përsëritur masat anti-Covid në Shqipëri.
Ambasada ruse në Tiranë reagoi ashpër pas dëbimit të Krivosheev duke theksuar se pretendimet e palës shqiptare për shkelje të masave Covid nuk qëndronin dhe se Tirana zyrtare kishte gabuar me publikimin e emrit të zyrtarit të dëbuar.
Pas dëbimit të tij, Rusia njoftoi se do përgjigjej në të njëjtën mënyrë.
Deklarata e Ministrisë së Jashtme të Rusisë
Më 8 shkurt, Ambasadori i Shqipërisë A. Gazioni ishte i ftuar në Ministrinë e Punëve të Jashtme Ruse, ku iu dha një shënim nga ministria që shpallte “persona non grata” Sekretaren e Parë të Ambasadës Shqiptare në Moskë, Yonida Drogu. Punonjëses së specifikuar iu tha të largohej nga territori i Federatës Ruse brenda 72 orësh.
Ky hap u mor nga pala ruse në përgjigje të vendimit të Shqipërisë për të dëbuar nga vendi nën një pretekst plotësisht të sajuar të Sekretarit të Parë të Ambasadës Ruse në Tiranë.
Ne i konsiderojmë veprimet e palës shqiptare si një provokim me qëllim për të fituar pikë politike në kushtet e fushatës zgjedhore që ka filluar në Shqipëri, duke luajtur së bashku me forcat anti-ruse në Perëndim dhe duke kërkuar mbështetjen e tyre.
Veprimet e palës shqiptare kundërshtojnë pretendimet e Tiranës për dëshirën për të zhvilluar marrëdhënie miqësore midis vendeve tona, në fakt, ato shtyjnë mundësinë e kapërcimit të ngecjes në çështjet dypalëshe. Kjo mospërputhje është për të ardhur keq.
