Ka ndërruar jetë nëna e kryeministrit Edi Rama, Aneta Rama.
Lajmin e hidhur e ka bërë të ditur vetë kryeministri, përmes një mesazhi në “Facebook”. Ai kujton fëmijërinë dhe thotë se ajo ishte drita dhe guri këndor i shtëpisë.
“Ishe drita dhe guri këndor i shtëpisë ku u rritëm e u bëmë burra e ku mbetëm gjithnjë fëmijë. E di që deri sa të shoh dot diellin e yjet do të jesh me mua, e bukur dhe e fortë si askush. Do të na mungosh shumë, por asgjë më shumë nuk bëje dot për ne, se sa e pamundura që bëre plot përkushtim gjithë jetën, prandaj prehu në paqe mam🙏”, shkruan Rama.
Kryeministri Edi Rama shpesh herë ka bërë dedikime në rrjetet sociale me nënën e tij. Madje edhe kur festoi ditëlindjen e 56-të këtë 4 korrik, postoi një foto ku shfaqet i përqafuar me zonjën Aneta. Atë e shoqëron me diçiturën: “Me gruan që më dha jetën”.
