Pas takimit që ka patur më herët me kryenegociatorin Zef Mazi, presidenti Ilir Meta ka reaguar përmes një postimi në rrjetet sociale.
Meta thotë se kanë diskutuar për perspektiven e çeljes së negociatave dhe se i ka ofruar mbështetjen e tij nga institucioni i Presidencës.
“Kënaqësi të prisja sot në takim Ambasador Zef Mazin, i emëruar nga Qeveria Kryenegociator për zhvillimin e negociatave për anëtarësimin e Shqipërisë në Bashkimin Europian.
Diskutuam hapur e në mënyrë konstruktive për perspektiven e çeljes së negociatave.
Ndërsa politika jonë duhet të tregojë vullnet për plotësimin e kushteve, është e rëndësishme përgatitja teknike dhe rritja e kapaciteteve negociuese.
E sigurova për mbështetjen e plotë në detyrën e tij nga institucioni i Presidentit të Republikës.
Integrimi europian është objektiv mbarëkombëtar.”– shkruan Meta.
Zef Mazi është zgjedhur nga kryeministri Edi Rama, si kryenegociator i Shqipërisë në negociatat e vendit tonë për integrimin në Bashkimin Europian.
Gjatë prezantimit të tij pak ditë më parë, kryenegociatori Mazi tha se ndihej shumë i vlerësuar që ishte zgjedhur në këtë pozicion dhe se do të vepronte si avokati më i mirë për Shqipërinë.
