Partia Demokratike i kërkon kryeministrit Rama e ministres së Mbrojtjes, Xhaçka, që të bëjnë transparencë për tenderin 1.5 milionë eurosh të blerjes së ushqimeve.
Në një deklaratë për mediat nga selia blu, Enkelejd Alibeaj tha se dyshja në vend që t’u përgjigjeshin pyetjeve të bëra për tenderin, zgjodhën të sulmojnë opozitën.
Alibeaj tha se nervozizmi i Ramës e Xhaçkës, tregon se ata po fshehin të vërtetën e tenderit prej 1.5 milionë eurosh që iu dha kompanisë së kompjuterave “Eurovia” nga Maqedonia e Veriut.
“Kemi 3 ditë që i kërkojmë qeverisë të bëjë transparencë për tenderin 1,5 milionë euro të ushqimeve, të bukës suaj. Pse ky tender iu dha një kompanie kompjuterash në Maqedoni? Kush fshihet pas saj?
Për 3 ditë Edi Rama dhe Olta Xhaçka heshtën. Asnjë fjalë, asnjë përgjigje. Sot, pas 3 ditësh, në vend të transparencës, Xhaçka sulmoi me gjuhë urrejtje opozitën. Ju të gjithë e dini thënien “mbrojtja më e mirë është sulmi. Por sulmi me shpifje vetëm zbulon sa nervozë janë Rama dhe Xhaçka. Zbulon se po fshehin të vërtetën e skandalit me 1,5 milion euro të shqiptarëve, për ushqimet e njerëzve në nevojë, që i janë dhënë një kompanie kompjuterash pa asnjë lidhje, në Maqedoni. Rama dhe Xhaçka e kanë për detyrë t’u përgjigjen pronarëve të 1,5 milonë eurove, që jane taksapaguesit shqiptarë:
- Pse, mes 35 000 kompanive shqiptare që merren me furnizimin e ushqimeve, zgjodhi për t’i dhënë 1,5 milionë euro, kompanisë së kompjuterave nga Maqedonia?
- Pse ia dha tenderin një kompanie maqedonase, e cila shtoi si subjekt tregtinë e ushqimeve vetëm 6 ditë para tenderit?
- Kush fshihet pas kësaj afere? Kush po përfiton në kurriz të njerëzve në nevojë?” – tha Alibeaj.
Më tej demokrati theksoi se asnjë shpifje kundër opozitës nuk mbulon apo justifikon abuzimet me paratë e shqiptarëve.
“Asnjë sulm me gjuhë urrejtje dhe asnjë shpifje kundër opozitës që po mbron interesat e shqiptarëve, nuk mbulon apo justifikon abuzimet me paratë e shqiptarëve në këtë kohë lufte.
Vjedhja dhe abuzimi me paratë dhe bukën e shqiptarëve duhet të marrin ndëshkimin e merituar. SPAK dhe Prokurori i Përgjithshëm duhet ta lënë karantinën dhe tën isin menjëherë hetimin e kësaj çështje.” – mbylli deklaratën demokrati.
