Futbolli duket e ka shumë të vështirë të shkëputet nga politika. Derbi i Tiranës që u zhvillua mbrëmjen e kaluar ka tërhequr vëmendjen e presidentit të vendit Ilir Meta.
Kjo sepse disa tifozë kanë shpalosur pankarta për manifestimin e thirrur më 2 mars nga presidenti, e ky i fundit shpreh një falenderim për ta.
“Derbi historik Tirana-Partizani edhe mbrëmë i dhuroi kryeqytetit e mbarë sportdashësve një ngjarje të jashtëzakonshme festive, me emocione tepër të forta, falë spektaklit si të lojtarëve në fushën e blertë, ashtu edhe të tifozëve që shkëlqyen si përherë me koreografitë e tyre brilante. Një falenderim special tifozëve të mrekullueshëm, për vëmendjen e tyre për Manifestimin Mbarëkombëtar të 2marsit”, shkruan Meta.
Derbi i kryeqytetit përfundoi dje me fitoren e Tiranës me rezultatin 5-1. Një humbje shkatërruese për demat e kuq, për të cilët është derbi i dytë që humbin brenda një sezoni.
Në këtë sfidë ekipet janë ndëshkuar edhe me nga një karton të kuq secila.
