Dy persona janë arrestuar nga policia, pasi akuzohen se po transportonin mallra të prodhuara në mënyrë të kundërligjshme. Sikur të mos mjaftonte kjo, sipas punonjësve të policisë ata u ofruan dhe ryshfet në mënyrë që të ia hidhnin përballjes me ligjin.
Dy shtetasit e identifikuar me inicialet B. A., 32 vjeç (shoferi) dhe pasagjer shtetasi B. S 39 vjeç, u ndaluan në Fushë Milot- Kurbin, ndërsa po transportonin me makinë një sasi e konsiderueshme pijesh alkoolike të prodhuar në mënyrë të kundërligjshme.
Në momentin kur janë ndaluar nga policia i kanë ofruar 2 kartëmonedha të prerjes 1 000 lekëshe, me qëllim shmangien e kontrollit të mjetit.
“Gjatë kontrollit të mjetit u gjetën dhe sekuestruan një sasi e konsiderueshme pijesh alkoolike të prodhuara në mënyrë të kundërligjshme.
Në vijim të veprimeve, Policia ka bërë arrestimin e shtetasve B. A. dhe B. S.
Materialet procedurale në ngarkim të tyre iu referuan Prokurorisë së Rrethit Gjyqësor Lezhë, për veprat penale “Prodhimi dhe shitja e ushqimeve dhe lëndëve të tjera të rrezikshme për shëndetin”, “Korrupsioni aktiv i personave që ushtrojnë funksione publike”, “Prodhimi i kundërligjshëm i artikujve dhe mallrave industriale e ushqimorë”, “Fshehja e të ardhurave” dhe “Manipulimi i tregut”.”- thuhet në njoftimi e policisë.