Një grua britaniko-australiane e arrestuar në Iran është identifikuar si Kylie Moore-Gilbert, specialiste e politikës së Lindjes së Mesme në Universitetin e Melburnit.
Sipas qeverisë australiane, ajo po mbahet prej disa muajsh tashmë në Iran, nën akuza të paqarta.
“BBC” shkruan se Dr. Moore-Gilbert është shtetasja e tretë e huaj që zbulohet këtë javë se është arrestuar në Iran. Shumë media raportojnë se ajo është dënuar me 10 vjet burg.
“Ne besojmë se shansi më i mirë për të siguruar kthimin e sigurt të Kylie-t është përmes kanaleve diplomatike”, thanë familjarët e saj në një deklaratë të publikuar përmes qeverisë Australiane.
Të martën qeveria Australiane identifikoi dy australianë të tjerë – Mark Firkin dhe Jolie King, të cilët gjithashtu po mbahen si të burgosur në Iran.
Ata po postonin në blogun e tyre pamje nga udhëtimi në Azi dhe Lindjen e Mesme dhe thuhet se u arrestuan 10 javë më parë në afërsi të Teheranit. Arrestimi i tyre nuk besohet të ketë lidhje me atë të Dr Moore-Gilbert.
Kjo e fundit është pedagoge e Studimeve Islame, që përqendrohet në shtetet arabe të Gjirit. Akuzat kundër saj nuk janë zbuluar, por zakonisht afatet 10-vjeçare të burgimit jepen në Iran për akuzat e spiunimit.
