Më shumë se 270 punonjës kanë humbur jetën në Indonezi, për shkak të lodhjes së shkaktuar nga orët e gjata të punës duke numëruar miliona fletë votimi me dorë.
“BBC” shkruan se Arief Priyo Susanto, zëdhënës i Komisionit të Përgjithshëm të Zgjedhjeve, tha se 1,878 punonjës të tjerë ishin sëmurë.
Rreth shtatë milionë njerëz po ndihmonin duke numëruar dhe monitoruar procesin e votimeve të 17 prillit.
Stafi duhej të punonte edhe gjatë natës në kushte të vapës, që u shkaktoi probleme shëndetësore. Kjo ishte hera e parë që vendi prej 260 milionë banorësh, kombinonte votën presidenciale me votat parlamentare kombëtare dhe rajonale, me qëllim që të kursente para.
Rreth 80% e 193 milionë votuesve të mundshëm votuan në më shumë se 800,000 vendvotime.
Por numri i madh i votuesve duket se i ka nxjerrë shumë punë stafit të përkohshëm të zgjedhjeve, të cilët ndryshe nga nëpunësit civilë, nuk i nënshtrohen një kontrolli mjekësor para fillimit të punës.
Zëdhënësi i Komisionit të Përgjithshëm të zgjeshjeve tha se 272 punëtorë kishin vdekur nga sëmundjet e lidhura me punën.
Komisioni i zgjedhjeve i Indonezisë planifikon të kompensojë familjarët me një shumë prej 36 milion rupiah (1,930 pound ose 2,500 dollarë) për çdo punëtor të vdekur – përafërsisht ekuivalente me pagën njëvjeçare minimale.
