Në fjalën e saj para parlamentit, kryetarja e LSI-së, Kryemadhi, solli edhe njëherë në vëmendje korrupsionin galopant dhe shkeljet ku Rama ishte kapur “me presh në duar”.
Ajo i kërkoi prokurorisë që të hetojë Damian Gjiknurin lidhur me skandalin e rrugës te Unaza e Re, ku u zbuluan falsifikimi i tenderit.
Kryemadhi kërkoi gjithashtu hetimin e Arben Ahmetajt për inceneratorët si dhe arrestimin e Vangjush Dakos për blerjen e zgjedhjeve që sipas opozitës është faktuar nga “Dosja 339”.
“Ka më shumë se 3 muaj që banorët e unazës së re kanë denoncuar një falsifikim, kanë denoncuar një vjedhje si ajo qe ka bërë DH Albania, e cila vodhi 18milion euro për të prishur shtëpitë tona dhe 12 milion të tjera. Kam dëshirë të dëgjojmë prokurorin shqiptare ku është me falsifikuesin e firmës së sekretarit të Shteteve të Bashkuara të Amerikës. Çfarë po bënë prokuroria me Damian Gjiknurin?
Çfarë po bënë prokuroria me Arben Ahmetajn që bilbilos sot në Kuvend si nuse e bukur me paratë që ka vjedhur nga buxheti i shqiptarëve! Çfarë po bën prokuroria me dosjen 339 që nuk frikëson vetëm Edi Ramën dhe shërbëtorët e tij por frikëson edhe ndonjë tjetër të hyjë në Parlament nga votat e bandave të Hamburgut!
Frikëson edhe dikë tjetër, që trafiku i drogës nuk blen vetëm votat për Edi Ramën dhe Vangjush Dakon në 2017-ën por merr peng institucione, merr peng shtetin, merr peng prokurorinë. Pse frikësohet Edi Rama dhe shërbëtorët e tij me dosjen 184?! A po blen vota për të futur mandate në emër të partive të tjera në Parlament.” – tha Kryemadhi.
