Tensione mes protestuesve që janë nisur nga Shkodra dhe policisë. Mësohet se policia ka ndaluar një autobus me protestues në Kryebushat dhe ka filmuar madje edhe listën e udhëtarëve.
Gjë kjo që ka sjellë përplasje mes tyre. Protestuesit e kanë konsideruar këtë si provokim të policisë ndaj tyre.
Të njëjtin shqetësim ka ngritur dhe deputeti Xhemal Gjunkshi, për qarkun e Dibrës. Ai ka akuzuar linjën e autobusave Dibër-Tiranë që u kanë marrë shënim edhe numrin e kartës së identitetit protestuesve.
‘’Ajo që të bie në sy është se Policia vijon presionin, ka tre pika që ushtron kontroll. U ka marrë shënim të gjithë personave emrat dhe kartën e identitetit. Është dhënë urdhër që asnjë furgon të mos lëvizë në drejtim të Tiranës, por qytetarët janë organizuar dhe janë nisur me mjetet e tyre”, deklaroi Gjunkshi.
Sipas të dhënave të para të Partisë Demokratike janë nisur më shumë se 50 mijë qytetarë drejt Tiranës për protestën e sotme. Qarku me pjesëmarrjen më të madhe të protestuesve është ai i Durrësit, më pas vjen Shkodra, Elbasani e Lezha.
