Pas ndërprerjes së reshjeve në vend, është përmirësuar lëvizja e mjeteve si dhe furnizimi me energji elektrike për ato zona që janë përballur me vështirësi.
Megjitatë temperaturat e ulëta në rrugë të ndryshme ka bërë që të rritet prania e ngricave dhe akullit kështu që policia rrugore u bën thirrje drejtuesve të mjeteve që të qarkullojnë me zinxhirë si dhe të ecin me shpejtësi të ulët.
Sipas ARRSH-së, në të gjitha rrugët kryesore të vendit qarkullimi është normal. Në rajonin verior qarkullimi bëhet me zinxhir në rrugët e mëposhtme:
Zalldardhë-Reç-Draj Reç
Kryqëzim Domaj-Draj Reç
Ura e Çerenecit-Steblevë, 20 km e fundit të rrugës.
Trebisht-Doganë
Ndërsa në rajonin jugor, qarkullimi bëhet me zinxhir vetëm në rrugën Boboshticë-Dardhë, në 2 kilometrat e fundit, për shkak të ngricave dhe për veçoritë që ka rruga.
Ndërkohë bregdeti do të përfshihet sot nga erëra të fuqishme dhe mjetet e lundrimit janë paralajmëruar të marrin masa pasi fuqia e dallgëve pritet të arrijë deri në 8 ballë.
