Tre persona kanë mbetur të plagosur pas një sulmi me thikë në stacionin hekurudhor të Winterthur, në veriperëndim të Zvicrës, ndërsa policia ka arrestuar autorin e dyshuar.
Sipas autoriteteve zvicerane, të plagosurit janë shtetas zviceranë të moshave 28, 43 dhe 52 vjeç, të cilët u transportuan në spital pas sulmit, përcjell BBC.
Policia bëri të ditur se i dyshuari është një 31-vjeçar zviceran, i cili përdori një armë të ftohtë, ndërsa motivet e ngjarjes mbeten ende nën hetim.
Një dëshmitar okular, që punonte në një ndërtesë pranë stacionit, tha për mediat lokale se dëgjoi autorin të bërtiste “Allahu Akbar” rreth orës 08:30 me orën lokale, përpara se të sulmonte njerëzit me thikë.
Sipas raportimeve lokale, në momentin e sulmit pranë zonës po kalonte një grup nxënësish dhe një mësues është parë duke u vendosur përpara tyre për t’i mbrojtur.
Një tjetër dëshmitar, shofer taksie, deklaroi për gazetën zvicerane Neue Zürcher Zeitung se autori po lëvizte në nënkalimin e stacionit duke sulmuar kalimtarët.
Fotot e publikuara nga mediat zvicerane tregojnë zona të shumta të stacionit të rrethuara nga policia, ndërsa hetimet për incidentin vijojnë.
