Britania e Madhe pritet të nisë bisedime me Bashkimin Europian për t’u përfshirë në një paketë huaje me vlerë 78 miliardë paund (rreth 106 miliardë dollarë) për mbështetjen e Ukrainës, në një sinjal të ri të forcimit të bashkëpunimit europian në fushën e mbrojtjes, përcjell Reuters.
Sipas qeverisë britanike, kryeministri Keir Starmer pritet të diskutojë këtë çështje në një samit të Komunitetit Politik Europian në Yerevan, ku Londra do të theksojë gatishmërinë për të bashkëpunuar më ngushtë me BE-në në furnizimin e Ukrainës me pajisje ushtarake.
Pjesa më e madhe e fondit të miratuar nga BE-ja muajin e kaluar pritet të përdoret për nevojat ushtarake të Kievit, në kuadër të mbështetjes për luftën kundër Rusisë.
Qeveria britanike theksoi gjithashtu se ky bashkëpunim mund të hapë mundësi për kompanitë britanike në sektorin e mbrojtjes, duke marrë pjesë në furnizimin e Ukrainës.
Në të njëjtën kohë, Londra ka njoftuar se do të shpallë një tjetër paketë sanksionesh ndaj kompanive ruse, me synimin për të goditur zinxhirët e furnizimit ushtarak të Moskës.
Vizita e Starmer në Armeni shënon gjithashtu një moment simbolik diplomatik, ndërsa ai theksoi nevojën për bashkëpunim më të ngushtë mes Britanisë dhe BE-së në fushën e mbrojtjes, në një kohë tensionesh globale dhe presioni nga SHBA për më shumë përgjegjësi europiane në siguri.
