Presidenti Joe Biden tha në një intervistë të enjten se nuk do ta falte djalin e tij, Hunter Biden, nëse ai shpallet fajtor për akuzat penale federale për armëmbajtje.
I pyetur nga gazetari David Muir i ABC nëse ai do e përjashtonte faljen e Hunter Biden, presidenti tha: “Po”.
Ai gjithashtu pohoi se do pranonte rezultatin e gjyqit, që po zhvillohet në Delaware.
Procedurat në sallën e gjyqit kanë hyrë në një kohë të vështirë për familjen Biden, pasi Hunter po luftonte me varësinë nga droga pas vdekjes së vëllait të tij Beau.
Zonja e Parë Jill Biden mori pjesë në gjyq përpara se të udhëtonte në Francë për t’u bashkuar me burrin e saj për aktivitetet përkujtimore të Ditës D.
Shtëpia e Bardhë kishte thënë më parë se Biden nuk do e falte djalin e tij.
“Kam qenë shumë e qartë; presidenti nuk do e falë djalin e tij”, tha në dhjetor sekretarja e shtypit Karine Jean-Pierre.
Djali i presidentit akuzohet për blerje dhe posedim të paligjshëm të një arme ndërsa abuzonte ose ishte i varur nga droga, një shkelje e ligjit federal.
Ai u deklarua i pafajshëm për tre akuzat, megjithëse ka qenë i hapur për betejat e tij me varësinë ndaj alkoolit dhe kokainës. Akuzat u ngritën nga këshilltari special David Weiss.
