Komanda Qendrore e ushtrisë izraelite nënshkroi të dielën një urdhër që e ngre zyrtarisht vendbanimin izraelit Givat Ze’ev, në veriperëndim të Jerusalemit Lindor të pushtuar, në statusin e qytetit.
Sipas Channel 7 të Izraelit, vendimi erdhi pas një periudhe koordinimi mes zyrtarëve të ministrive të Mbrojtjes dhe të Brendshme, në kuadër të politikave izraelite për zgjerimin e vendbanimeve në territoret palestineze të pushtuara.
Kreu i bashkisë së Givat Ze’ev, Yossi Asraf, deklaroi se ky ndryshim do të nxisë zhvillimin dhe do të përmirësojë shërbimet në vendbanim, ku jetojnë më shumë se 35 mijë kolonë izraelitë.
Statusi i ri pritet t’i japë vendbanimit kompetenca më të gjera administrative dhe më shumë fonde nga qeveria, duke mundësuar përshpejtimin e projekteve të ndërtimit dhe zgjerimit urban, si edhe tërheqjen e banorëve të rinj.
Ministri izraelit i Financave, Bezalel Smotrich, tha se shpallja e Givat Ze’ev si qytet është pjesë e politikës së qeverisë për forcimin e vendbanimeve dhe konsolidimin e statusit të tyre ligjor.
Ai shtoi se ky veprim do të ndihmojë në krijimin e një “muri mbrojtës” kundër krijimit të një shteti palestinez.
Sipas organizatës izraelite kundër vendbanimeve Peace Now, rreth 500 mijë kolonë izraelitë jetojnë në vendbanimet në Bregun Perëndimor të pushtuar, ndërsa rreth 250 mijë të tjerë jetojnë në vendbanimet e ngritura në Jerusalemin Lindor të pushtuar.
Organizata e Kombeve të Bashkuara ka përsëritur vazhdimisht se vendbanimet izraelite në territoret palestineze të pushtuara janë të paligjshme sipas së drejtës ndërkombëtare dhe ka paralajmëruar se ato minojnë perspektivën e zgjidhjes me dy shtete.
Palestinezët këmbëngulin që Jerusalemi Lindor të jetë kryeqyteti i shtetit të tyre të ardhshëm, në përputhje me rezolutat ndërkombëtare, të cilat nuk e njohin pushtimin izraelit të vitit 1967 dhe as aneksimin e qytetit në vitin 1980, shkruan AA,
