Qeveria e Izraelit miratoi njëzëri të dielën propozimin e ministrit të Jashtëm Gideon Sa’ar për njohjen e gjenocidit armen, një hap historik që pritet të thellojë më tej marrëdhëniet tashmë të tensionuara me Turqinë.
“Nuk është kurrë vonë për të bërë atë që është e drejtë,” tha Sa’ar gjatë mbledhjes së kabinetit.
Rezoluta përcakton se Izraeli, “mbi bazën e detyrimit moral dhe historik”, njeh gjenocidin e kryer ndaj popullit armen në vitet e fundit të Perandorisë Osmane. Ajo gjithashtu bën thirrje për dënimin e çdo mohimi, minimizimi ose shtrembërimi të së vërtetës historike mbi këto ngjarje.
Izraeli kishte shmangur prej kohësh njohjen zyrtare, pjesërisht për shkak të shqetësimeve lidhur me marrëdhëniet me Turqinë dhe Azerbajxhanin. Turqia e kundërshton përdorimin e termit “gjenocid”, ndërsa Azerbajxhani, një partner strategjik i Izraelit që kufizohet me Iranin dhe ka lidhje të rëndësishme ushtarake me Jerusalemin, ka kundërshtuar gjithashtu njohjen.
Shënimet shpjeguese të rezolutës thonë se gjenocidi nisi në prill të vitit 1915 me arrestimin, dëbimin dhe vrasjen e intelektualëve dhe drejtuesve armenë në Kostandinopojë. Më pas, sipas dokumentit, autoritetet osmane ndërmorën një fushatë sistematike kundër popullsisë armene, duke vrarë burrat e dërguar në punë të detyruar dhe duke dëbuar gratë, fëmijët dhe të moshuarit në marshime vdekjeje drejt shkretëtirës siriane, shkruan Ynet.
Teksti thekson se rreth 1.5 milionë armenë u vranë dhe se një trashëgimi kulturore e historike shekullore në Anadoll u shkatërrua.
Rezoluta shton gjithashtu se gjenocidi armen vazhdon të jetë objekt i një fushate të organizuar mohimi, veçanërisht nga Turqia, pavarësisht dokumentimit të gjerë historik. Në dokument theksohet se 32 shtete e kanë njohur gjenocidin armen në forma të ndryshme.
