Lionel Messi ishte protagonisti absolut në fitoren 3-0 të Argjentinës ndaj Algjerisë, në ndeshjen e parë të Argjentinës në 2026 FIFA World Cup.
Kapiteni i argjentinasve dha një sinjal të qartë se mbetet ende lojtari më i rëndësishëm i skuadrës, duke realizuar të tre golat e sfidës dhe duke i siguruar ekipit një nisje perfekte të turneut.
Messi kaloi në avantazh Argjentinën në pjesën e parë me një goditje të fortë nga jashtë zone, e cila përfundoi në rrjetën e portierit Luka Zidan. Në fraksionin e dytë, ai përfitoi nga një ndërhyrje e pasigurt e gardianit algjerian dhe shtyu topin në rrjetë për golin e dytë.
Ylli argjentinas vulosi paraqitjen e tij të shkëlqyer me një tjetër goditje të saktë pranë zonës së rreptësisë, duke kompletuar tripletën personale dhe duke fiksuar rezultatin përfundimtar 3-0.
Fitorja i jep Argjentinës tre pikët e para në grup, ndërsa Messi konfirmon edhe një herë statusin e tij si lideri i padiskutueshëm i “Albiceleste”-s në rrugëtimin drejt mbrojtjes së titullit botëror.
