Gjashtë persona të armatosur u vranë dhe një u arrestua pas një përplasjeje me Gardën Kombëtare dhe Ushtrinë meksikane në qytetin Jucutacato, në jug të komunës Uruapan, shkruan Borderland Beat.
Sipas mediave lokale, një kolonë e përbashkët e Ushtrisë dhe Gardës Kombëtare u sulmua gjatë një patrulle në rrugën mes Jucutacato dhe Cutzato në orët e para të mëngjesit të së mërkurës, 24 qershor. Ushtarët u kundërpërgjigjën me zjarr, duke vrarë gjashtë sulmues dhe duke kapur një tjetër. Dy sulmues të tjerë arritën të ikin, duke lënë pas armë dhe dy automjete.
Një tjetër përplasje me armë mes La Línea dhe La Gente Nueva del Tigre la të paktën pesë të vdekur jashtë qytetit Tutuaca, në San Francisco de Borja, Chihuahua, këtë mëngjes.
Përplasja ka ndodhur me shumë gjasa gjatë natës ose në orët e para të 27 qershorit. Në vendngjarje, autoritetet gjetën pesë trupa, tre prej tyre të djegur, ndërsa dy të tjerët u gjetën pranë rrugës. U gjetën gjithashtu gëzhoja plumbash dhe pesë karikatorë, por nuk u gjetën armë apo pajisje taktike, çka sugjeron se njëra palë mund të ketë grabitur vendin pas fitores në përplasje.
Përplasja ishte mes La Línea, krahu i armatosur i Kartelit të Nuevo Juárez dhe La Gente Nueva del Tigre, një fraksion i lidhur me “Los Mayos” të Kartelit Sinaloa.
Pavarësisht një rënie prej 20% në vitin 2026, shteti i Chihuahua-s ka një nga normat më të larta të vrasjeve në Meksikë. Në pesë muajt e parë të 2026, ai u rendit i treti në nivel kombëtar për numrin e viktimave, me 590 vrasje.
