Në Gjykatën e Posaçme kundër Korrupsionit dhe Krimit të Organizuar GJKKO është zhvilluar seanca gjyqësore ndaj kryetarit të Bashkisë së Tiranës, Erion Veliaj, e cila është shoqëruar me mungesa të shumta të të pandehurve dhe përfaqësuesve ligjorë, si dhe me debate procedurale mes palëve.
Gjatë seancës janë konstatuar mungesa të disa të pandehurve dhe subjekteve juridike, përfshirë Meriman Palushin dhe Sokol Kryeziun, ndërsa në disa raste mbrojtja është përfaqësuar vetëm nga avokatët e caktuar.
Për shoqërinë “Palushi sh.p.k.” dhe disa subjekte të tjera janë paraqitur vetëm përfaqësues ligjorë, ndërsa për “Fusha sh.p.k.” ka qenë i pranishëm avokati Uljan Bajrami. Po ashtu, mungesa janë regjistruar edhe për përfaqësues të disa OJF-ve dhe kompanive të tjera të përfshira në dosje.
Në sallë ka qenë i pranishëm edhe Plarent Ndreca, ndërsa është raportuar se disa avokatë mbrojtës ndodhen jashtë vendit ose janë zëvendësuar.
Nga ana e SPAK është kërkuar pezullimi i afateve të paraburgimit, me argumentin se mungesat e mbrojtjes po shkaktojnë vonesa në proces.
Mbrojtja e Veliajt e ka kundërshtuar këtë kërkesë, duke theksuar se i pandehuri nuk është shkaktar i vonesave procedurale.
Në përfundim, gjykata vendosi shtyrjen e seancës dhe caktimin e një date të re për vijimin e shqyrtimit gjyqësor.
