Trupat e copëtuar të gjashtë burrave u gjetën në pjesën e pasme të një kamioni të braktisur në qytetin Teticic, në rajonin Montana të shtetit Guerrero, herët në mëngjesin e së enjtes. Sipas raporteve të policisë, trupat duket se i përkisnin disa banorëve lokalë që ishin rrëmbyer nga burra të armatosur të cilët hynë në komunitet të mërkurën, më 20 maj.
Pas raportimeve, pjesëtarë të Ushtrisë Meksikane, Gardës Kombëtare dhe forcave shtetërore kërkuan zonën gjatë natës, por nuk arritën të gjenin viktimat apo personat e armatosur. Mëngjesin pasues, banorët raportuan se kishin gjetur një makinë “Nissan” të braktisur në hyrje të komunitetit, ku brenda qeseve të zeza u zbuluan gjashtë trupa të copëtuar.
Gjatë javëve të fundit, kjo zonë është përballur me zhdukje personash, vrasje dhe braktisje trupash. Gazeta lokale Interaccion Noticias raportoi se të paktën 19 trupa janë lënë në këtë rajon gjatë dy muajve të fundit.
Më 30 mars, në rrugën nga Olinalá drejt Cualac, policia gjeti shtatë trupa të vendosur në kuti të zeza dhe tenxhere alumini, sipas raportimit të Borderland Beat. Dy javë më vonë, më 11 maj, edhe gjashtë trupa të tjerë u gjetën të braktisur në autostradën Olinalá-Temalacatzingo.
Ky rajon është objekt i një lufte të ashpër mes grupeve kriminale, me të paktën tre organizata kriminale që operojnë në rajonin malor të Guerrero-s: Los Tlacos, Los Ardillos dhe Los Rojos. Ato ushtrojnë ndikim të madh në zonë dhe sulmojnë rregullisht autoritetet dhe civilët lokalë, shkruan Borderland Beat.
Në shkurt 2024, Manuel Eugenio Arriaga Rosendo, këshilltar i bashkisë së Cualác, u gjet i vdekur brenda shtëpisë së tij. Katër muaj më vonë, persona të armatosur sulmuan me armë shtëpinë e kryebashkiakut të Cualac, Hazael Aburto Ortega.
