Drejtori i FBI-së, Kash Patel, ka shkarkuar agjentët që ishin përfshirë në gjurmimin e telefonatave të tetë senatorëve republikanë dhe një kongresmeni, si pjesë e hetimit të ish-Prokurorit të Posaçëm Jack Smith ndaj Presidentit Donald Trump.
Sipas raportimeve, të dhënat e komunikimit që i përkisnin senatorëve Lindsey Graham (Karolina e Jugut), Marsha Blackburn (Tennessee), Ron Johnson (Wisconsin), Josh Hawley (Missouri), Cynthia Lummis (Wyoming), Bill Hagerty (Tennessee), Dan Sullivan (Alaska), Tommy Tuberville (Alabama) dhe përfaqësuesit Mike Kelly (Pennsylvania) iu dorëzuan ekipit “Arctic Frost” të Smith-it pas kërkesave zyrtare ndaj kompanive të mëdha telefonike në vitin 2023, shkruan Breitbart.
Ky fakt nuk ishte i njohur për publikun deri këtë javë, kur Patel zbuloi se dosjet ishin fshehur në një “kasafortë” digjitale, në një “vend kibernetik ku askush nuk mund t’i shihte apo t’i kërkonte ato skedarë.” Ai e cilësoi këtë si një shkelje serioze të besimit dhe premtoi reforma të thella brenda FBI-së për të rikthyer transparencën dhe integritetin institucional.
Në një intervistë të martën për Fox News, Drejtori i FBI-së Kash Patel deklaroi se kishte zbuluar dosje të fshehura që përmbanin të dhëna të mbledhura përmes hetimeve sekrete ndaj ligjvënësve republikanë – përfshirë tetë senatorë dhe një kongresmen – si pjesë e hetimit të ish-Prokurorit të Posaçëm Jack Smith ndaj Presidentit Donald Trump.
Sipas Patel, këto dosje ishin fshehur në një “kasafortë kibernetike” që kërkonte autorizimin e Prokurorit të Përgjithshëm dhe Drejtorit të FBI-së për t’u krijuar. Ai tha: “Jo vetëm që e politizuan zbatimin e ligjit, por kur hymë aty, dhe kur unë mora drejtimin si drejtor i FBI-së, nga përvoja ime me Russiagate, e dija ku të kërkoja, cilat dhoma të hapja dhe cilat dyer të përplasja — dhe këtë bëmë.”
Patel shtoi se kishte shkarkuar agjentët që kishin ndihmuar në mbledhjen dhe fshehjen e të dhënave të komunikimit të senatorëve, duke e cilësuar si një përpjekje për ta mbajtur të fshehtë nga publiku. “Po gërvishtim vetëm sipërfaqen, por llogaridhënia po vjen. Po, i kam shkarkuar ata agjentë. Po, e kam shpërbërë CR-15, njësinë e korrupsionit publik që udhëhoqi politizimin në Zyrën e FBI-së në Uashington. Ne sapo kemi nisur, por do ta çojmë hetimin deri në fund. Nuk do të lëmë asnjë dhomë të mbyllur.”
Senatori Josh Hawley, një nga ligjvënësit që kishte telefonatat e tij të ndjekura nga Departamenti i Drejtësisë nën administratën Biden, e quajti veprimin e Smith-it “një abuzim me pushtetin që tejkalon Watergate-in dhe J. Edgar Hoover-in, një sulm i drejtpërdrejtë ndaj Kushtetutës, ndarjes së pushteteve dhe Amendamentit të Parë.”
