Kabineti i luftës në Izrael ka vendosur për një veprim “të qartë dhe vendimtar” pas sulmit me raketa dhe drone të Teheranit të shtunën. Përgjigja do duhet të jetë në përputhje me vullnetin e SHBA-së, sipas mediave izraelite.
Irani lëshoi një breshëri me raketa si dhe dronë, në hakmarrje për bombardimin e konsullatës së tij në Damask, Siri në fillim të këtij muaji që vrau disa oficerë të lartë të Forcës Quds të Gardës Revolucionare Islamike (IRGC).
Forcat e Mbrojtjes të Izraelit (IDF) thonë se kanë rrëzuar shumicën dërrmuese të raketave dhe dronëve me ndihmën e SHBA-së, Britanisë së Madhe, Francës, Jordanisë dhe të tjerëve.
“Ky lëshim i kaq shumë raketave e dronëve në territorin e Izraelit do përballet me një përgjigje”, tha të hënën shefi i shtabit të IDF-së, Gjenerallejtnant Herzi Halevi.
Halevi foli nga baza ajrore “Nevatim” pranë Beersheba, një nga vendet e goditura nga sulmi iranian. IDF-ja ka raportuar “dëme të vogla” në objekt, por nuk ka dhënë hollësi.
“Irani donte të dëmtonte aftësitë strategjike të Izraelit, kjo është diçka që nuk kishte ndodhur më parë”, tha Halevi, duke shtuar se IDF-ja kishte përgatitur “Operacionin Mburoja e Hekurt” për të kundërshtuar sulmin.
“Izraeli është shumë i fortë dhe di si ta trajtojë sulmin i vetëm, por me një kërcënim kaq të madh dhe kaq të largët, ne jemi gjithmonë të lumtur që kemi SHBA-në me vete”, shtoi Halevi.
Ndërkohë, kabineti i luftës i kryeministrit Benjamin Netanyahu ka rënë dakord të ndërmarrë një lloj veprimi në përgjigje të Teheranit, raportoi gazeta e njohur izraelite “Mako” të hënën në mbrëmje.
Sipas botimit, hakmarrja do duhet të jetë e pranueshme për SHBA-në dhe të “përputhet” me rregullat e vendosura nga Uashingtoni, ndërsa gjithashtu të matet në atë mënyrë që “të mos e çojë rajonin në luftë”.
