Mijëra fermerë indianë protestues të pajisur me vinça dhe ekskavatorë vendosën të mërkurën të marshojnë drejt kryeqytetit Nju Delhi, pasi bisedimet me qeverinë për çmimet e garantuara për prodhimet e tyre nuk arritën të zhbllokoheshin.
Veprimi, i ndjekur nga forcat e sigurisë, erdhi pasi grupet e fermerëve hodhën poshtë një propozim të qeverisë këtë javë për kontrata pesëvjeçare dhe garantuan çmime mbështetëse për prodhime të tilla si misri, pambuku dhe bishtajat.
Fermerët, kryesisht nga shteti verior i Punjabit, kanë kërkuar çmime më të larta të mbështetura me ligj për të korrat e tyre. Ata formojnë një bllok me ndikim votuesish dhe kryeministri Narendra Modi ndodhet në telashe pasi në maj janë zgjedhjet e përgjithshme.
Fermerët kanë thënë se do marshojnë drejt kryeqytetit ndërsa autoritetet i kanë ndaluar duke ngritur barrikada në kufirin e shtetit Punjab me Haryana, rreth 200 km në veri të Delhit, duke bllokuar një autostradë.
FNSH-ja u vendos në dy anët e autostradës së barrikaduar rëndë, ndërsa fermerët, të mbledhur mes mjegullës së mëngjesit, valëvitnin flamuj shumëngjyrësh të zbukuruar me simbolet e sindikatave të tyre.
