Ushtria amerikane tha të dielën se forcat e saj hapën zjarr ndaj rebelëve Houthi pasi ata sulmuan një anije mallrash në Detin e Kuq, duke vrarë disa prej tyre në një përshkallëzim të konfliktit detar të lidhur me luftën në Gaza.
Në një seri deklaratash, Komanda Qendrore e SHBA-së tha se ekuipazhi i shkatërruesit “USS Gravely” fillimisht rrëzoi dy raketa balistike të gjuajtura ndaj anijes Maersk Hangzhou me flamur të Singaporit të shtunën vonë, pasi anija raportoi se u godit nga një raketë më herët atë mbrëmje. ndërsa lundronte nëpër Detin e Kuq Jugor.
Katër varka të vogla më pas sulmuan të njëjtën anije mallrash me armë të vogla të dielën herët dhe rebelët u përpoqën të hipnin në anije, tha Marina e SHBA-së.
Më pas, “USS Gravely” dhe helikopterët nga aeroplanmbajtësja “USS Dwight D. Eisenhower” iu përgjigjën thirrjes së Maersk Hangzhou dhe lëshuan paralajmërime verbale për sulmuesit, të cilët u përgjigjën duke qëlluar mbi helikopterët.
“Helikopterët e marinës amerikane u përgjigjën me zjarr për vetëmbrojtje, duke fundosur tre nga katër varkat dhe duke vrarë njerëzit në bord ndërsa anija e katërt u largua nga zona”, tha Komanda Qendrore e SHBA. Nuk u raportua asnjë dëm i personelit apo pajisjeve të SHBA-së, apo viktima nga anija e mallrave.
Houthi-t pranuan se 10 nga luftëtarët e tyre u vranë në konfrontim dhe paralajmëruan për pasoja.
