Deputetja e Partisë Demokratike, Ina Zhupa ka reaguar për arrestimet për inceneratorin e Tiranës.
Zhupa e cilëson lajm të mirë por i bën thirrje SPAK që të hetojë duke shkuar te kokat e vërteta duke akuzuar kryeministrin Edi Rama si personin që ka firmosur kontratën.
Deputetja akuzon edhe kryetarin e bashkisë Tiranë, Erion Veliaj si të përfshirë në skemë pasi sipas saj miratoi inceneratorin pa e kaluar në Këshillin Bashkiak.
Postimi i plotë:
Arrestimet e SPAK për inceneratorin e Tiranës janë lajm i mirë nëse janë vetëm nisja e arrestimeve që do çoj te kokat e vërteta të aferës.
I bëj thirrje SPAK të hetojë inceneratorin e Tiranës, duke përfshirë dhe kryeministrin Rama, i cili është personi që ka firmosur kontratën.
“Ligji detyron që tenderi zgjat 52 ditë, ndërsa për qeverinë Rama vetëm 16 ditë. Duke bërë kështu shkeljen e parë për Inceneratorin e Tiranës. Vallë këta punonjësit bashkiak e bënë këtë shkelje ligjore?! Sigurisht që jo
Por pse u bë kjo shkelje? Sepse fituesi ishte paracaktuar dhe ishte Mirel Mërtiri, i cili nuk është i panjohur por që kishte marrë dhe dy inceneratorët e tjerë, atë të Elbasanit dhe Fierit përmes të afërmve të tij.
I madh e i vogël e kupton që Bashkia Tiranë nuk do futej në aferë 430 milion euro vetëm me vullnetin e disa punonjësve bashkiak.
Kjo skemë nuk kishte si të mos përfshinte dhe kryetarin e Bashkisë së Tiranës, Erion Veliajn.
Shkresa për të marrë mendim i është dërguar të 5-tave bashkive të qarkut Tiranë.
Në vend që shkresa t’i dërgohej Këshillit Bashkiak, Erion Veliaj nuk e kalon në Këshillin Bashkiak, e firmos vetë për të dhënë pohimin për inceneratorin e Tiranës. Jo vetëm që anashkalon Këshillin Bashkiak, por vendos edhe për 4 bashkitë e tjera të qarkur Tiranë.
Pse e bën ai këtë shkelje, pse Erion Veliaj ka shkelur ligjin? Kjo është një pyetje të cilës duhet t’i përgjigjet SPAK, ku duhet të zbulojë dhe rolin e Erion Veliajt në këtë aferë dhe pse e ka shkelur ligjin, çfarë përfitimesh ka pasur.
SPAK ka detyrimin që t’i lidhë zyrtarët, siç janë të lidhur me njëri-tjetrin, si një grup i strukturuar kriminal, me në krye kryetarin e qeverisë, Edi Rama dhe kryetarin e bashkisë Erion Veliaj.
Çdo përpjekje për t’i copëzuar synon mbrojtjen e tyre nga kjo akuzë e tmerrshme dhe reale dhe nuk ndihmon në nxjerrjen para drejtësisë të atyre që kanë vjedhur qindra miliona euro nga taksat e qytetarëve.
