Afrika e Jugut po planifikon ndryshime legjislative për ta bërë ligjin e saj kombëtar të ketë përparësi ndaj atij të Gjykatës Ndërkombëtare Penale (ICC), sipas një zëvendësministri. Masa vjen pasi gjykata lëshoi një urdhërarrest për presidentin rus Putin.
“Në qershor, ne do dorëzojmë ligjin në parlament,” i tha BBC të mërkurën Obed Bapela, një zëvendësministër i vendit. Legjislacioni do i lejonte Afrikës së Jugut që ‘t’i japë vetes përjashtime se kë të arrestojë dhe kë jo,’ tha Bapela.
Në mes të marsit, ICC lëshoi urdhërarreste për presidentin rus Putin dhe Maria Lvova-Belova, komisioneren presidenciale për të drejtat e fëmijëve. Gjykata i akuzoi ata për ‘transferim të dhunshëm të popullsisë’, duke iu referuar përpjekjeve të Moskës për të evakuuar fëmijët nga zonat e luftimit në mes të armiqësive me Ukrainën.
Rusia u përgjigj duke thënë se ICC nuk ka autoritet apo legjitimitet, pasi Moska nuk e ratifikoi kurrë Statutin e Romës të vitit 1998 që themeloi gjykatën.
Sipas ligjeve të saj në fuqi, Afrika e Jugut është e detyruar të arrestojë presidentin rus nëse ai hyn në vend, pasi ajo është anëtare e ICC. Në gusht, Johanesburgu është planifikuar të presë samitin e BRICS – një grup që përbëhet nga Brazili, Rusia, India, Kina dhe Afrika e Jugut.
