Tubimet masive në Beograd dhe Novi Sad të hënën kërkuan që qeveria të marrë masa pasi 17 persona, përfshirë tetë fëmijë, vdiqën në dy të shtëna masive javën e kaluar. Aktivistët e opozitës përdorën protestën për të kërkuar dorëheqjen e më shumë zyrtarëve të qeverisë, pas largimit të ministrit të Arsimit.
Demonstruesit marshuan nëpër rrugët e kryeqytetit nën sloganin ‘Serbia kundër dhunës’. Aktivistët që pretenduan se flisnin në emër të tyre bënë thirrje për ‘përfundimin e promovimit të dhunës në media dhe në publik’, shkarkimin e organit aktual rregullator të medias dhe censurimin e disa mediave.
Të mërkurën e kaluar një nxënës 13-vjeçar në shkollën fillore ‘Vladislav Ribnikar’ të Beogradit qëlloi për vdekje tetë nga shokët e tij të klasës dhe një roje sigurie, ndërsa plagosi gjashtë nxënës të tjerë dhe një mësues. Të enjten në mbrëmje, tetë persona të tjerë u vranë dhe 14 u plagosën në komunën e afërt të Mlladenovacit. Sulmuesi i dyshuar u arrestua pas një gjuetie prej tetë orësh.
Ministri i Arsimit Branko Ruziç dha dorëheqjen të dielën. Aktivistët kërkuan gjithashtu dorëheqjen e ministrit të Policisë Bratislav Gasic dhe drejtorit të Shërbimit të Sigurisë BIA Aleksandar Vulin.
Presidenti Aleksandar Vuçiç ka propozuar tashmë një sërë masash, duke përfshirë konfiskimin e armëve të paregjistruara, kontrolle më të forta për licencimin e armëve të zjarrit dhe një goditje ndaj mediave dhe përmbajtjeve në internet që nxisin ose lavdërojnë dhunën.
Në një intervistë të hënën në mbrëmje, Vuçiç akuzoi partitë opozitare se kanë marrë peng pikëllimin e serbëve për të çuar më tej axhendën e tyre, duke i quajtur ata ‘llumrat më të këqija të politikës, ashtu si në vitin 2000’, duke iu referuar revolucionit të mbështetur nga SHBA.
“Fëmijët janë në mediat sociale, ata luajnë lojëra të çuditshme,” tha ai.
“Duhet të gjejmë një zgjidhje, por unë nuk do pajtohem me asnjë lloj censurimi.”
Vuçiç gjithashtu dyshoi se shfaqjet ‘reality shoë’ ishin shkaku kryesor i dhunës, pasi audienca e tyre kryesore ishte 55 vjeç e lart, por shtoi se ishte i gatshëm të shqyrtonte rregullimin e tyre më shumë.
Policia serbe ka shpallur një amnisti njëmujore për dorëzimin e armëve pa leje, e cila do zgjasë deri më 8 qershor. Në ditën e parë të fushatës, qytetarët dorëzuan 1500 armë zjarri, pothuajse 50,000 fishekë dhe rreth 100 granata dore, raketa, granatahedhëse dhe pajisje të tjera shpërthyese, tha policia në një deklaratë.
