Ish-kryeministri italian Silvio Berlusconi paralajmëron se BE-ja nuk do ishte në gjendje të mbrohej nëse Kina vendos të sulmojë një nga shtetet e saj anëtare. Politikani veteran i kërkoi Brukselit të miratojë një strategji të fuqishme ushtarake dhe të investojë shumë në mbrojtje.
Berlusconi i bëri komentet në një intervistë video të regjistruar të premten nga kanali i lajmeve Sky TG24. Aktualisht ai ndodhet në spitalin ‘San Raffaele’ në Milano dhe po trajtohet për leuçeminë, e cila iu diagnostikua në fillim të prillit.
Ish-kryeministri tha se BE-ja vështirë se është një forcë për t’u llogaritur në arenën ndërkombëtare dhe nëse Kina vendos të ‘pushtojë Italinë, dhe ndoshta ndonjë vend tjetër evropian, ne absolutisht nuk do të jemi në gjendje t’i kundërvihemi’.
“Gjëja më e mirë që mund të bënim do të ishte të shkonim në shkollë për të mësuar gjuhën kineze,” shtoi ai.
Për të përmirësuar gjendjen e saj, tha Berlusconi, BE-ja duhet të miratojë një ‘politikë të vetme ushtarake, me bashkëpunim të fortë midis forcave të armatosura të të gjitha vendeve evropiane’.
Ai gjithashtu mbrojti një rritje të shpenzimeve të mbrojtjes dhe krijimin e një ‘korpusi emergjence’ prej 300,000 trupash.
Politikisht, Berlusconi tha se do të dëshironte të shihte një ‘kontinent vërtet të bashkuar’ – diçka që do të ishte më e arritshme nëse blloku do të hiqte ‘parimin e njëzëshmërisë’ në votim në favor të një shumice prej 80-85%, argumentoi ai.
Ai vazhdoi të theksojë se BE-ja mund dhe duhet të luajë një rol më të madh në botë, duke përfshirë qëndrimin ndaj asaj që Berlusconi e përshkroi si ‘imperializëm kinez’.
