Franca do të parandalojë nëpunësit civilë që të shkarkojnë të gjitha llojet e platformave të mediave sociale, aplikacioneve të lojërave dhe transmetimit të videove në telefonat e tyre të punës për shkak të shqetësimeve të sigurisë kibernetike dhe privatësisë.
Ndalimi, i cili hyn në fuqi menjëherë, përfshin TikTok, por nuk kufizohet vetëm në platformën në pronësi kineze.
Masa e Francës vjen pas ndalimeve nga institucionet evropiane dhe vende të tjera të BE-së si Holanda. Ndryshe nga Brukseli dhe Haga, megjithatë, qeveria franceze synon gjithashtu aplikacionet dhe platformat perëndimore nga Evropa dhe Shtetet e Bashkuara.
“Këto aplikacione rekreative nuk janë krijuar për të garantuar një nivel të mjaftueshëm të sigurisë kibernetike për t’u vendosur në mjetet digjitale të administratës,” tha Ministri për Digjitalizimin Jean-Noël Barrot. “TikTok, por edhe CandyCrush apo Netflix janë prekur nga kjo masë”.
Përjashtimet mund të jepen për qëllime “komunikimi institucional”, shton deklarata.
Më herët në mars, zëdhënësi i qeverisë Olivier Véran tha se ministrat dhe presidenti Emmanuel Macron nuk mund të shkarkonin aplikacione të mediave sociale si Instagram dhe TikTok në telefonat e tyre të punës. Ai shtoi se qeveria po punonte për një politikë të efektshme për nëpunësit civilë.
Në fillim të kësaj jave, zyrtarët e lartë të Asamblesë Kombëtare inkurajuan fuqishëm kolegët deputetë që të “kufizojnë” përdorimin e aplikacioneve të mediave sociale dhe shërbimeve të mesazheve si Instagram, TikTok, Snap dhe Signal.
