Një 48-vjeçar është arrestuar në Vorë pasi akuzohet se është përpjekur të vrasë një bashkëfshatar brenda një lokali.
Në pranga ka rënë E.P. i cili sipas policisë kishte shkuar në lokalin ku qëndronte 39-vjeçari E.P. dhe kishte qëlluar në drejtim të tij me armë gjahu.
Autorit të dyshuar i është kapur arma e gjahut me fishek në fole.
Njoftimi
“Parandalohet një ngjarje e rëndë kriminale në Vorë. Tentoi të vriste me armë gjahu një shtetas, në ambientet e një lokali, falë ndërhyrjes në kohë nga shërbimet e Policisë, kapet dhe vihet në pranga 48-vjeçari. Sekuestrohen arma e gjahut (çifte) me fishekë në fole dhe municion luftarak. Shërbimet e Komisariatit të Policisë Vorë, ditën e djeshme, pas marrjes së njoftimit për një shtetas që po tentonte të vriste një shtetas tjetër, në një fshat të Vorës, menjëherë kanë organizuar dhe finalizuar operacionin policor të koduar “Ndërhyrja”, për parandalimin e ngjarjes kriminale.
Falë ndërhyrjes në kohë nga shërbimet e Policisë, u kap dhe u ndalua shtetasi E. P., 48 vjeç, i cili kishte hyrë me forcë në ambientet e lokalit ku po qëndronte shtetasi E. P., 39 vjeç, dhe kishte qëlluar me armë gjahu në drejtim të tij, për motive të dobëta. Arma e gjahut, të cilën 48-vjeçari e mbante me leje, u sekuestrua në cilësinë e provës materiale, së bashku me një sasi municioni luftarak. Në përfundim të veprimeve u bë arrestimi në flagrancë i shtetasit E. P., 48 vjeç, banues në Vorë, për veprat penale “Vrasja me dashje” mbetur në tentativë, “Shkatërrimi i pronës” dhe “Prishja e qetësisë publike”. Materialet i kaluan Prokurorisë, për veprime të mëtejshme procedurale.”
