Një panel ligjvënësish kanadezë ka bërë thirrje që programi i asistuar i vetëvrasjes në vend të shtrihet edhe për të miturit, edhe në rastet kur prindërit e tyre kundërshtojnë vendimin për t’i dhënë fund jetës së tyre, shkruan National Review.
Komiteti i posaçëm i deputetëve dhe senatorëve, i cili u ngarkua me rishikimin e programit të ashtuquajtur ‘ndihmë mjekësore në vdekje’ (MAiD) të Otavës, lëshoi një sërë rekomandimesh këtë javë në Dhomën e Komunëve të Kanadasë.
Raporti i kërkoi qeverisë të ndryshojë ligjin e saj për vetëvrasjen e asistuar për ta vënë shërbimin në dispozicion të të miturve që mendohet se kanë ‘kapacitetin e nevojshëm vendimmarrës’.
Vetëvrasja e asistuar duhet të jetë e disponueshme vetëm për ‘të miturit e pjekur’, ‘vdekja natyrore e të cilëve është e parashikueshme në mënyrë të arsyeshme’, tha komiteti.
Qeverisë do t’i duhet të vendosë standarde për vlerësimin e aftësisë së një të riu për të marrë një vendim të tillë, shtoi raporti, por ligjvënësit nuk ofruan specifika se sa e afërt do duhej të ishte vdekja e një personi që qeveria t’i ndihmonte në dhëien fund të jetës.
Komiteti sugjeroi gjithashtu që prindërit ose kujdestarët duhet të konsultohen për vendimin e vetëvrasjes së fëmijës së tyre ‘aty ku është e përshtatshme’. Megjithatë, Otava gjithashtu duhet të kërkojë që ‘vullneti i një të mituri që rezulton se ka kapacitetin e nevojshëm vendimmarrës të marrë përparësi’, sipas raportit.
Një rekomandim tjetër i bëri thirrje qeverisë që ‘të ndërmarrë konsultime me të miturit për temën e MAiD, duke përfshirë të miturit me sëmundje terminale, të miturit me aftësi të kufizuara, të miturit në sistemin e mirëqenies së fëmijëve dhe të miturit indigjenë’.
Kritikët e programit MAiD të Kanadasë kritikuan gjetjet e panelit.
“Adoleshentët e pakënaqur janë një barrë e tillë për shtetin e mirëqenies, sa Parlamenti beson se mjekët duhet të paguhen për t’i vrarë ata,” tha prezantuesi i podcast-it Kevin Michael Grace.
Komiteti publikoi raportin e tij pasi dëgjoi gati 150 dëshmitarë, raportoi të enjten Global Neës i Kanadasë.
Shumë nga dëshmitarët argumentuan se të miturit tashmë lejohen të marrin vendime për ndalimin e trajtimit mjekësor, përshpejtimin e vdekjes së tyre në disa raste dhe niveli i vuajtjes që ata durojnë nga një sëmundje terminale nuk është një funksion i moshës.
Më shumë se 30,000 kanadezë kanë vdekur nga vetëvrasja e asistuar që kur u legalizua për njerëzit me sëmundje terminale në vitin 2016. Programi u zgjerua në vitin 2021 për të përfshirë të rriturit me kushte serioze dhe kronike mjekësore, edhe nëse sëmundja e tyre nuk ishte kërcënuese për jetën.
Ligjvënësit u vendosën këtë vit të konsiderojnë shtrirjen e kualifikimit të MAiD për njerëzit që vuajnë vetëm nga një sëmundje mendore, por Prokurori i Përgjithshëm David Lametti njoftoi paraqitjen e këtij projektligji në fillim të këtij muaji.
