Komisioni i Letrave me Vlerë në Bahamas (BSC) ka thënë se ka marrë kontrollin e depozitave FTX me vlerë më shumë se 3.5 miliardë dollarë, menjëherë pasi shkëmbimi i kriptove paraqiti kërkesën për mbrojtjen nga falimentimi.
Sipas një njoftimi për media të publikuar të enjten vonë nga komisioni, të gjitha asetet dixhitale në njësinë e FTX në Bahamas FTX Digital Markets u sekuestruan për shkak të rrezikut të ‘zhdukjes së tyre të menjëhershme’.
Raporti theksoi se menjëherë pasi FTX paraqiti për falimentim, rreth 372 milionë dollarë asete u vodhën nga shkëmbimi nga një person i panjohur që mendohet se ishte një haker i jashtëm. BSC tha se asetet dixhitale janë nën ‘kontrollin ekskluziv’ të saj derisa Gjykata e Lartë e vendit të lejojë rregullatorin t’i kthejë ato te klientët dhe kreditorët që i zotërojnë, ose te likuiduesit.
Ndërkohë, ish-shefi ekzekutiv i FTX, Sam Bankman-Fried, i cili është akuzuar për orkestrimin e një skeme shumëvjeçare për të mashtruar investitorët e kapitalit prej afro 2 miliardë dollarësh, u lirua javën e kaluar me kusht 250 milionë dollarë. Ai thuhet se është në shtëpinë e prindërve të tij në Kaliforni, në pritje të gjykimit.
Dy nga bashkëpunëtorët e ngushtë të kriptomanjatit të rrëzuar, ish-shefi i teknologjisë së FTX, Gary Wang dhe ish-CEO i Alameda Research, Caroline Ellison, janë deklaruar fajtorë për akuzat penale në lidhje me kolapsin e shkëmbimit të kriptomonedhave. Ata aktualisht janë duke bashkëpunuar me hetimin e Departamentit të Drejtësisë.
Sipas Komisionit të Sigurimeve dhe Shkëmbimeve të SHBA (SEC), Bankman-Fried devijoi miliarda dollarë fondet e klientëve për të ndihmuar në rritjen e entiteteve të tjera të tij.
SEC ka akuzuar gjithashtu se deri në fund të muajit të kaluar, ai po vazhdonte të mashtronte investitorët ndërsa përpiqej të mbushte një vrimë shumë miliarda dollarëshe në bilancin e FTX. Kjo sjellje u ndal vetëm kur FTX dhe Alameda paraqitën për mbrojtje nga falimentimi më 11 nëntor, ka akuzuar rregullatori.
