Një skandal korrupsioni është denoncuar këtë të hënë nga televizioni “News 24”. Në një investigim, gazetarët e këtij televizioni kanë siguruar pamjet filmike nga disa raste të marrjes së ryshfetit në portin e Durrësit, sipas kësaj medieje “përveç korrupsionit flagrant cenohet siguria kombëtare dhe interesat e ligjshëm të shtetit, duke i lënë në duart e subjekteve private vulat zyrtare.”
Në videon e publikuar shihet shefi i turnit te sektori i eksporteve në portin e Durrësit, Drini Maxhari, që merr paratë nga subjektet private. Maxhari filmohet edhe në të paktën dy raste të tjera duke marrë ryshfet.
Po kështu, në këtë skemë është i përfshirë edhe doganieri i kontrollit fizik të importeve në portin e Durrësit, Skerdilajd Palnikaj. Ai është vëllai i Dritan Palnikaj, ish-sekretar i përgjithshëm i Ministrisë së Brendshme, ish-drejtor i Shërbimit të Brendshëm të Burgjeve dhe aktualisht këshilltar i kryeministrit Rama.
Palnikaj filmohet duke siguruar subjektin privat pas marrjes së ryshfetit se nuk do ketë pengesa në futjen e mallin në territorin shqiptar.
Sipas investigimit në fjalë, “është një rrjet i mirëfilltë i shtrirë në të gjitha strukturat e doganës, ku çdo hallkë e sistemit është e lidhur me njëra tjetrën në funksion të ryshfetit”. Të gjitha rastet e marrjes së ryshfetit bëhen nëpër zyra dhe sportele doganore, nën monitorimin e qindra kamerave të sigurisë, por të pashqetësuar doganierët marrin haptas paratë.
Biseda e filmuar me shefin e turnit tek eksportet Drini Manxharin:
Shefi i turnit te eksportet: Hajde mo këtu (merr lekët)
Qytetari: Për katër eksporte
Shefi i turnit te eksportet: OK
Qytetari: Mirupafshim!
Biseda e filmuar me Skerdilajd Palnikajn:
Doganieri Skerdilajd Palnikaj: Jepja letrat, ka shumë mundësi që do vish prapë te mua. (Afron dorën dhe merr paratë)
Qytetari: Mirëbesim
Doganieri Skerdilajd Palnikaj: Ok
Qytetari: Në rregull
Doganieri Skerdilajd Palnikaj: Po erdhe, pa merak ta mbyllim direkt.
Qytetari: Rrofsh!
