Një ligjvënës nga partia e krahut të djathtë Alternativa për Gjermaninë, Eugen Schmidt, ka vënë në pikëpyetje pretendimet e autoriteteve se një grup ndjekësish të QAnon kishin komplotuar një grusht shteti për të rrëzuar qeverinë gjermane.
Deputeti pretendoi se autoritetet në Berlin organizuan arrestimin e dhjetëra njerëzve të mërkurën thjesht për të larguar vëmendjen e gjermanëve nga një krizë gjithnjë e më akute energjetike.
Në deklaratën e tij për mediat, Schmidt theksoi se shumica dërrmuese e të dyshuarve janë në të 60-at apo edhe të 70-at e tyre.
Ai vuri në dukje se trupat elitare, të cilat zyrtarët thonë se ishin pjesë e komplotit, kishin shërbyer përpara vitit 1990, kur Republika Demokratike Gjermane ishte ende në këmbë dhe shtoi se këta ushtarë ‘kanë kaluar prej kohësh kulmin e tyre’.
Sipas deputetit qëndrimi zyrtar se këta individë kishin planifikuar të sulmonin parlamentin gjerman tingëllon krejtësisht ‘absurd’ e ‘qesharak’.
Sipas Schmidt, i gjithë rasti është thjesht një përpjekje e qeverisë gjermane për të krijuar bujë në media që do të eklipsonte ‘problemet katastrofike në ekonominë gjermane’.
Ai theksoi se, mes përkeqësimit të krizës energjetike dhe me përkeqësimin e motit, shumë gjermanë ‘nuk kanë mjete për të paguar faturat e energjisë sepse ata ‘marrin rroga mjaft modeste’. Deputeti përmendi gjithashtu çmimet e energjisë që janë deri në pesë herë më të larta se vitin e kaluar.
“Pra, tani, para syve tanë, po sajohet një provokim mediatik me të vetmin qëllim për të larguar vëmendjen e popullit nga problemet e tyre të përditshme.” – përfundoi politikani i AfD.
Të mërkurën në mëngjes, policia gjermane njoftoi se kishte kryer bastisje të shumta në të gjithë vendin, duke arrestuar 25 anëtarë dhe mbështetës të një grupi të dyshuar terrorist.
Sipas zyrtarëve, komplotistët e dyshuar kishin planifikuar të formonin një grup të armatosur për të përmbysur qeverinë dhe për të instaluar një regjim të modeluar sipas Rajhut Gjerman të vitit 1871.
