Sekretari Organizativ në PD, Klevis Balliu, ka drejtuar gishtin nga kryeministri Rama për goditjen fizike të kreut të partisë Sali Berisha.
Në një shënim në Facebook, ai shkruan se dhuna e paralajmëruar gjatë protestës së opozitës nga analistët e paguar nga Rama nuk ndodhi dhe ajo fakton se pas sulmit qëndron kreu i qeverisë.
Balliu shton se skenari parashikonte që dhuna ndaj Berishës të provokonte dhunë e përplasje megjithatë plani dështoi duke theksuar se tani është koha që Rama të mbajë përgjegjësi për sulmin.
“Të gjithë analistët e paguar nga narko-eurot e Ramës që paralajmëruan dhunë deri në luftën e tretë botërore në protestën e opozitës me 6 Dhjetor, duke zbatuar linjën mediatike të partisë, janë një fakt që organizatori ishte kryetari i Partisë Socialiste Edi Rama, i cili shpresonte që atentati ndaj liderit të opozitës Sali Berisha, do të irritonte qytetarët në protestë deri në pikën që ata të shkonin në përplasje. Falë Sali Berishës plani i tij meskin dhe naziskin dështoi me sukses. Tani është koha për mbajtjen e përgjegjësisë për krimin dhe shkallmimin e vlerave perëndimore dhe euroatlantike nga Edi Rama që funksionon me kodin e Omertës.” – shkruan Balliu.
