Ish-presidenti Donald Trump thuhet se synon të shpallë hyrjen e tij në garën presidenciale 2024 më vonë këtë muaj, kur ai pret që republikanët të jenë në festë pasi të rimarrin kontrollin e Kongresit në zgjedhjet afatmesme të javës së ardhshme.
’Rrethi i brendshëm’ i Trump synon 14 nëntorin si datën për të zbuluar kandidaturën e tij për të rimarrë presidencën, raportoi Axios të premten, duke cituar njerëz të paidentifikuar, me dijeni mbi diskutimet. Bisedimet e planifikimit janë përshkallëzuar deri në pikën ku aleatët e Trump thuhet se po shënojnë data në kalendarët e tyre dhe po rezervojnë planet e tyre të udhëtimit.
Njoftimi do pasohet nga një sërë ngjarjesh politike për të nxitur fushatën e Trump, sipas Axios. Një zëdhënës i Trump kundërshtoi të komentojë mbi planet. Ato ende nuk janë përmbyllur dhe koha mund të shtyhet bazuar në rezultatet e zgjedhjeve afatmesme të Kongresit, sipas medias.
Trump e aleatët e tij kanë lënë të kuptohet në javët e fundit se njoftimi i fushatës së tij 2024 është i afërt, por ata nuk kanë bërë publike datën. Ish-menaxherja e tij e fushatës, Kellyanne Conway, u tha gazetarëve se Trump ishte frenuar në publikimin e kandidaturës për të shmangur largimin e vëmendjes nga kandidatët e Kongresit në zgjedhjet afatmesme të 8 nëntorit.
Ish-presidenti duket se po shtronte terrenin për njoftimin e tij për vitin 2024 të enjten mbrëma në një tubim në Sioux City, Iowa.
“Për ta bërë vendin tonë të suksesshëm, të sigurt dhe të lavdishëm, ndoshta do ta bëj përsëri, në rregull?” – i tha ai turmës brohoritëse.
Ai shtoi, “Bëhuni gati, kjo është gjithçka që po ju them, shumë shpejt, bëhuni gati.”
Shtetet e Bashkuara mund të drejtohen në një ripërplasje Biden-Trump duke qenë se presidenti ka treguar se ai synon të kërkojë rizgjedhjen në vitin 2024, megjithëse nuk e ka shpallur ende zyrtarisht kandidaturën e tij.
