Gjermania ka rënë dakord të lejojë grupin kinez të transportit Cosco të blejë aksione në një terminal në portin më të madh të vendit në Hamburg, raportuan media të ndryshme duke cituar kabinetin gjerman.
Kompania kineze do lejohet të blejë 24.9% të aksioneve në një nga tre terminalet e firmës logjistike HHLA. Cosco fillimisht bëri një ofertë për 35% të aksioneve vitin e kaluar. Megjithatë, opinionet u ndanë brenda qeverisë gjermane nëse një veprim i tillë do i jepte shumë fuqi kompanisë kineze, e cila tashmë është klienti më i madh i portit.
Ministria e Jashtme gjermane nuk e mirëpriti miratimin e marrëveshjes dhe hartoi një shënim në një mbledhje të kabinetit duke dokumentuar opinionin e saj, raportoi Reuters duke cituar dy burime qeveritare. Shënimi, i parë nga media, thoshte se marrëveshja ‘zgjeron në mënyrë disproporcionale ndikimin strategjik të Kinës në infrastrukturën e transportit gjerman dhe evropian, si dhe varësinë e Gjermanisë nga Kina’. Burimet thanë se Ministria e Ekonomisë dhe katër ministri të tjera u bashkuan në hartimin e dokumentit.
Sipas Euroneës, Ministria e Çështjeve Ekonomike të Gjermanisë tha se vendimi për të ulur sasinë e aksioneve të shitura fillimisht ishte marrë për të parandaluar Cosco-n që të kishte një ‘investim strategjik’ në terminal dhe se kompania nuk do lejohej të kalonte pragun prej 25% pa një rishikim të ri të qeverisë. Sipas kushteve të marrëveshjes, firmës kineze do t’i ndalohet gjithashtu t’i japë vetes të drejtën e vetos mbi vendimet strategjike të biznesit ose personelit.
Sipas mediave gjermane, kancelari Olaf Scholz e mbështeti marrëveshjen që në fillim. Megjithatë, presidenti Frank-Walter Steinmeier paralajmëroi më parë se mund të jetë një hap drejt bërjes shumë të varur nga Kina.
“Ne duhet të nxjerrim mësime dhe të mësojmë të pakëzojmë varësitë e njëanshme kudo që të jetë e mundur, dhe kjo vlen për Kinën në veçanti.” -tha Steinmeier për ARD të martën.
Mbështetësit e marrëveshjes thonë se kjo do i japë Hamburgut një përparësi ndaj rivalëve të tij. Cosco tashmë ka aksione në disa porte të tjera në Evropë, duke përfshirë Pireun në Greqi. Që nga 30 shtatori 2022, kompania operoi dhe menaxhoi 367 vendkalime në 37 porte në mbarë botën, sipas faqes së internetit të Cosco.
