Në një deklaratë për mediet, ministri i Drejtësisë Ulsi Manja, ka treguar dy akt-propozimet që u miratuan ditën e sotme nga Këshilli i Ministrave.
Bëhet fjalë për dëmshpërblimin financiar të disa ish-të përndjekurve politikë dhe për projektligjin për shërbimin përmbarimor shtetëror. Ai shpjegoi dhe se cila kategori e ish-të përndjekurve do përfitojë nga ky vendim.
“Kaluan dy akte që vijnë si propozim i Ministrisë së Drejtësisë. Akti i parë është ai i dëmshpërblimit financiar për ish-të përndjekurit politik, ku do të jenë 54 subjekte që e kanë të plotë dokumentacionin që përfitojnë.
Subjektet që përfitojnë janë ata që kanë vuajtur dënimet kapitale, kanë qenë të izoluar në hetuesi apo kanë qenë nën efektin e masave mjekësore apo atyre psikiatrike. Dëmshpërblimi do të merret i ndarë në këste.
Subjektet e përfitimit janë jo vetëm ata që i kanë vuajtur vetë këto vite burgu, por edhe familjarët e tyre. Kjo masë as i zhbën dhe as i kthen vitet e vuajtjes së ish-të përndjekurve, por tregon interesin për këtë shtresë.
Akti i dytë është projektligji për shërbimin përmbarimor shtetëror. Ka për qëllim të rregullojë dhe t’i japë zgjidhje problematikave të këtij shërbimi. Domozdoshmëri për dy arsye. Ky shërbim nuk garanton cilësi në shërbimet për qytetarët shqiptarë dhe operon mbi një ligj të vitit 2001. Ne kemi gati të gjithë paketën nënligjore të këtij ligji.
Në fakt i kam dëgjuar reagimet e fillimit të javës lidhur me ligjin për të drejtën e informimit publik. Këto ligje janë nisma janë të propozuara nga komisionerit për të drejtën e informimit dhe mbrojtjen e të dhënave personale. Më lejoni t’ju them se diskutimi për këto ndryshime ka nisur që në vitin 2018 dhe i janë nënshtruar një konsultimi të gjerë publik dhe diskutimeve me grupet e interest. Ne jemi të hapur për të gjitha sugjerimet nga shoqëria civile lidhur me këtë projektligj. Përpara se ligji të vinte në Ministrinë e Drejtësisë ka marrë edhe ekspertizën e ekpertëve të OSBE-së. Është kjo qeveri që në vitin 2014 ka miratuar ligjin për të drejtën e informimit publik dhe ligjin për njoftimin dhe konsultimin publik dhe përfshirjen e qytetarëve në vendimmarrje.
Në vitin 2022 jemi po ne që kemi miratuar konventën për aksesin në dokumentat zyrtare dhe në një sërë dokumentash të tjera. Qëllimi ynë është shumë i qartë, qytetarët duhet të jenë pjesë e qeverisjes. Në fakt lidhur me amnistinë penale është traditë që çdo fundviti të ketë amnisti penale. E fundit është bërë në vitin 2020. Ne po bëjmë një studim dhe në momentin që do të dalim me një rezultat do t’ju njoftojmë.”- deklaroi Manja.
