Presidenti amerikan Joe Biden ka deklaruar se megjithëse nuk ka marrë një vendim zyrtar për të rikandiduar për një tjetër mandat në vitin 2024, “qëllimi” i tij është që ta bëjë këtë.
“Unë nuk e kam marrë ende atë vendim zyrtar, por është qëllimi im të kandidoj sërish. Dhe ne kemi kohë për ta marrë atë vendim.”– i tha Biden gazetarit Jonathan Capehart të MSNBC në një intervistë, citon CNN.
Çështja e së ardhmes politike të Bidenit do të jetë në qendër të vëmendjes për demokratët pas zgjedhjeve afatmesme të nëntorit, në të cilat partia po lufton për të mbajtur kontrollin e Kongresit. Tashmë, përgjigjet e Presidentit se ai do të bëjë një tjetër ofertë për Shtëpinë e Bardhë kanë injektuar dilema për garën e 2024-ës.
Muajin e kaluar, Biden tha se ishte “shumë herët” për të marrë vendimin nëse ai do të kandidonte përsëri për president në 2024. Por duket se ka ndryshuar qëndrim. Në moshën 79-vjeçare, Biden është tashmë presidenti më i vjetër në historinë amerikane. Të premten, Presidenti Biden tha se zonja e parë Jill mendon se puna që ata po bëjnë është “shumë e rëndësishme”.
“Gruaja ime mendon se unë – se ne po bëjmë diçka shumë të rëndësishme dhe se unë nuk duhet të largohem prej kësaj.”- tha Biden.
I pyetur se çfarë do t’u thoshte djali i tij i ndjerë, Beau Biden, njerëzve që mendojnë se Presidenti është shumë i vjetër për të kandiduar, Biden tha: “Nuk është aq shumë se çfarë ai do t’u thoshte atyre njerëzve. Ajo që ai do të më thoshte mua në këndvështrimin tim. Arsyeja e vetme për t’u përfshirë në jetën publike është se a mund ta bëni jetën më të mirë për njerëzit e tjerë. Dhe në varësi të asaj se kush është kundërshtari, nëse ata kanë një pikëpamje të kundërt me atë që unë besoj se demokracia është dhe unë besoj se është e mirë për klasën e mesme, atëherë argumenti i tij do të ishte, ‘babi, ti ke detyrim të bësh diçka’.”
