Një grevë kombëtare në Francë të martën ka bërë që lëvizjet me tren të anulohen dhe shkollat të mbyllen teksa sindikatat kërkojnë paga më të larta për punëtorët në mes të inflacionit në rritje dhe një krize energjetike.
Sipas një prej sindikatave më të mëdha të vendit, CGT, protestuesit po bëjnë thirrje për ‘rritje të pagave, pensioneve dhe minimumit social dhe përmirësimin e kushteve të jetesës dhe të studimit’.
CGT shpjegoi në një deklaratë se aksioni i sotëm industrial është një zgjatje e grevës njëjavore të rafinerisë që ka mbyllur pikat e karburantit në gjithë vendin. Sindikata akuzoi administratorët e e gjigantëve të naftës, Total e Exxon në veçanti, për ‘fitime të mëdha’ duke injoruar kërkesat e punonjësve të goditur nga kriza e kostos së jetesës.
Ndërsa lëvizja e protestës po përhapet jo vetëm në industrinë e energjisë, por në ‘sektorët publikë dhe privatë’, sindikata tha se tani është koha që ‘punonjësit, pensionistët, të papunët dhe të rinjtë’ t’i bashkohen aksionit industrial.
Norma e inflacionit në Francë aktualisht kalon 6%, ndërkohë që pothuajse të gjithë sektorët industrialë të vendit kanë shënuar rënie të veprimtarisë për shkak të krizës në rritje të energjisë, e cila është përkeqësuar nga sanksionet antiruse dhe rënia e mprehtë e furnizimeve ruse me energji.
Greva, që mbështetet nga disa sindikata të mëdha, ka çuar në ndërprerje masive. SNCF, kompania kombëtare shtetërore e hekurudhave, lëshoi një paralajmërim se trafiku do ndërpritej ‘në disa linja’.
Shërbimi hekurudhor Eurostar njoftoi se duhej të anulonte disa trena mes Londrës dhe Parisit për shkak të ndalimit të punës.
Transporti detar gjithashtu mund të ndikohet, pasi disa porte dhe doke njoftuan se do pushonin së punuari për disa orë të martën.
Greva ka detyruar disa shkolla të mbyllen pasi shifrat e para zyrtare nga Ministria e Arsimit tregojnë se rreth 6% e mësuesve po marrin pjesë në aksion. Numri është veçanërisht i lartë në shkollat e mesme profesionale, ku shkalla e pjesëmarrjes ka arritur gati 23%.
Ndërkohë, një nga ministrat e vendit, duke komentuar grevën të martën, akuzoi pjesëmarrësit e saj se nuk i përmbahen ‘kulturës së dialogut’.
“Unë e kuptoj që një numër i caktuar punonjësish mund të shprehin pritshmëri për përmirësim të fuqisë blerëse. Por unë u them atyre se në Evropë, ne jemi qeveria që i kemi mbrojtur më së shumti banorët e saj për sa i përket inflacionit.” – tha për Europe 1 Christophe Bechu, ministri për Tranzicionin Ekologjik.
Zyrtari theksoi se grevat po përkeqësojnë më tej një gjendje që tashmë është mjaft e vështirë për shkak të ‘luftës në Ukrainë’.
