Forcat RENEA kanë zhvilluar një aksion kontrolli në Shijak për të shumëkërkuarin Ervis Martinaj, rreth dy muajsh pas zhdukjes së tij.
Sipas televizionit “News 24” kontrollet janë zhvilluar mbrëmjen e djeshme nga RENEA.
Familjarët e tij e denoncuan zhdukjen e Martinajt më 9 gusht teksa ai ishte shpallur në kërkim ndërkombëtar në kuadër të operacionit “Plumbi i Artë”.
Këtu autoritetet u gjetën në mëdyshje pasi nuk dinin si të vepronin. Por emri i Martinajt kishte dalë në dëshminë e bashkëpunëtorit të drejtësisë Nuredin Dumani i cili tha se kishte marrë një porosi për të eliminuar Endrit Doklen.
Policia po heton dy pista: Atë të vrasjes dhe rrëmbimit të Martinajt, apo edhe mundësisë së vetë një inskenimi nga i shumëkërkuari.
Martinaj është shfaqur për herë të fundit në kamerat e sigurisë së një hoteli në qytetin bregdetar të Durrësit pak ditë para zhdukjes. Në kamerat e sigurisë, Martinaj duket në shoqërinë e një vajze të njohur dhe shoferit të tij, agjentit të Operacionales Jeton Lami.
