Këngëtarja turke Gulsen është arrestuar dhe akuzuar për nxitje të urrejtjes për një shaka që ka bërë lidhur me shkollat fetare.
Në prill, këngëtarja tha me shaka se “perversiteti” i një anëtari të grupit të saj vinte për shkak se ai kishte marrë pjesë në një shkollë fetare.
Pavarësisht se komenti i këngëtares kishte disa muaj, ato së fundmi u bënë virale në internet, duke tërhequr kritika nga qarqet konservatore ccka solli dhe ngritjen e akuzës ndaj saj.
Kritikët thonë se arrestimi është një përpjekje e presidentit Rexhep Tajip Erdogan për të konsoliduar mbështetjen përpara zgjedhjeve të vitit të ardhshëm, shkruan BBC.
Para arrestimit të saj, Gulsen, e cila shihet si Madonna e Turqisë kishte kërkuar falje në mediat sociale për batutën dhe sugjeroi se fjalët e saj u nxorën nga konteksti nga ata që synojnë të “polarizojnë shoqërinë“.
Këngëtarja tha se ndërsa “mbronte lirinë e shprehjes” me “shakanë mes kolegëve” i kërkon falje “të gjithëve që u ofenduan”. Ajo po mbahet në paraburgim në pritje të gjykimit.
Presidenti Erdogan, Partia e të cilit erdhi për herë të parë në pushtet rreth 20 vjet më parë, studioi në një nga shkollat e para fetare të vendit Imam Hatip, të cilat u themeluan nga shteti për të edukuar të rinjtë për të qenë imamë dhe predikues. Në institucionet fetare kanë marrë pjesë edhe shumë të tjerë në qeveri. Këngëtarja, emri i plotë i së cilës është Gulsen Colakoglu, është kritikuar më parë nga elementë konservatorë të shoqërisë turke për veshjen e saj dhe mbështetjen për të drejtat LGBT.
Arrestimi i 46-vjeçares ka përçarë vendin, me mbështetësit konservatorë dhe pro-qeveritar që i përshkruan komentet e saj si “pafytyrësi“, ndërsa zëra më liberalë dhe pro opozitës e kritikuan arrestimin e saj si joproporcional dhe reaksionar. Shumë përdorues të Twitter-it e dënuan arrestimin e Gulsen, ndërsa kujtuan mungesën e veprimeve ligjore kundër një teologu, i cili kohët e fundit sugjeroi vrasjen e atyre që nuk falin namazin.
Avokatja Feyza Altun tha se vendimi nuk ka “asnjë arsye ligjore” dhe argumentoi se Gulsen u arrestua vetëm për shkak të veshjeve të saj skenike, besimeve, “qëndrimit sfidues” dhe mbështetjes për komunitetin LGBT.
